*Mas di 73 grupo a mustra interes pa inverti den proyecto - ORANJESTAD (AAN): Minister di Turismo Dangui Oduber a laga sa cu gobierno di Aruba tin un proyecto pa revitalisa Caya Betico Croes.
Prome cu eleccion tabata tin un presentacion unda Prome Minister Wever-Croes a anuncia un proyecto na cual ta bay dedica hopi tempo y haci e inversionnan necesario tambe rebiba centro di ciudad.
E meta ta pa haci Caya Betico Croes mas atractivo cu proyectonan di vivienda, negoshi y 'Food & Beverage'. Banda di esaki Aruba Ports Authority (APA N.V.) tambe lo contribui pa haci e inversion necesario pa mustra e turista cu Aruba tin un 'downtown' unda por bay haci compras y haci uzo di dje, e mandatario a splica.
El a sigui bisa cu loke no kier ta pa 'Port City' bira un competencia pa Caya Betico Croes. Esey a bisa for di e momento cu a cuminsa pensa riba e plannan. Aworaki cu ta asina leu di cuminsa ehecuta e proyecto, no kier pa 'Port City' competi cu Caya Betico Croes.
E ta bay bira un combinacion di diferente actividad pa no bay competi necesariamente cu Caya Grandi, a remarca.
Minister Oduber a indica cu ora cu yega asina leu, Ministerio di Turismo y tambe APA lo presenta e proyecto un biaha mas pa asina comunidad conoce e plannan, kico ta bay bira 'Port City' y con ta bay ehecuta esaki y con e terenonan ta bay wordo otorga.
Esaki ta den man di APA NV cual tin un proceso delinea caba riba con cada percela ta bay wordo otorga na e gruponan cu a mustra interes, a señala.
Tur cos ta mustra cu mas di 73 grupo cu a indica cu nan tin interes pa inverti den e area aki, cual ta un 'prime location' y cu ta e ultimo area cu tin habri pa desaroyo na Aruba.
E mandatario a expresa cu e interes tey y Aruba mester di inversionnan na e momentonan aki. "Mi ta sigur cu Port City lo bira un joya di un proyecto na momento cu nos bay ehecuta esaki. E no ta bira un proyecto di un, dos aña. E ta bira un master plan di entre 15 pa 20 aña (...) E ta bay den diferente fase", Oduber a duna di conoce.
