Despues cu Hitler a abusa di Weganan Olimpico na 1936
- Fin di encuentro deportivo entre militar Ruso y Hulandes
- Conseho Internacional di Deporte Militar mester actua
ORANJESTAD (AAN)- Mientras e horor di Guera di Ukraine ta continua, militarnan Hulandes no por participa na encuentronan deportivo caminda nan mester enfrenta militarnan participante Ruso.
Esaki ta declaracion di e Ministro di Defensa di Hulanda, cu a reacciona riba e participacion di Hulandes na un torneo di judo pa militarnan na cual tambe militarnan Ruso a participa.
Pa DIARIO e declaracion di e Ministro di Defensa Ollongren tabata sumamente importante teniendo cuenta cu e horornan cu ta wordo comete dor di Rusia den e Guera na Ukraine y e falta di respet total pa bida humano y hende dor di Putin y su aliadonan.
Torneonan di deporte internacional pa un gran parti no por conoce participacion di Rusia mas mientras nan ta representa Rusia.
Den e caso aki ta trata di un evento cu a wordo organisa pa e Conseil International Sport du Militair, cu aparentemente no ta tene cuenta cu e realidad cu imediatamente despues di e torneo, e militarnan por topa den bataya sangriente causa pa e crimen humano cu Rusia ta comete sigur na Ukraine.
Segun e Ministro Hulandes a trece dilanti, e participacion di militarnan Hulandes a bay a base di e invitacion di e Conseho Internacional di Deporte pa Militarnan, cu ta bisa cu mester invita tur e 140 paisnan miembro.
Sinembargo, e pais organisador si por dicidi cu e no ta invita Rusia pa participa na e encuentronan.
Pa e torneonan na Republica Dominicana, Rusia a wordo invita. A avisa e militarnan aparentemente pa no drenta den contacto cu e Rusonan pero Ollengren a admiti cu e conseho aki no tabata suficiente pa un evento caminda pa hasta e bandera Hulandes a bula banda di e bandera Ruso.
Loke a pasa na e torneo aki ta contra e decision di e organisadornan di Wega Olimpico cu a dicidi cu no ta invita Rusia ni Bellarus na e weganan di otro aña. Esaki ta nifica cu nan bandera lo no ta presente.
Sin duda e Comete Olimpico Internacional kier evita e loke a pasa na 1931 ora el a dicidi cu e weganan Olimpico di 1936 lo a wordo teni na Berlin y asina a bira un show di propaganda pa Adolf Hitler, cu a ocasiona matansa di inocentenan y a bira causante di Segundo Guera Mundial.
E pregunta grandi na Hulanda a keda con Hulanda, cu ta parti di NATO y ta sostene e base di e Tratado di paisnan Noord Atlantico, por a dicidi di participa na e weganan na cual Rusia tambe a tuma parti.
Segun e Ministro ni su persona ni e mando militar di Hulanda tabata na haltura di e participacion na e encuentro cu el a afirma cu ta un arma pa Rusia haci propaganda.
For di e momento aki encuentronan entre militarnan di Hulanda y Rusia ta prohibi mientras mundo ta confronta e realidad, cu Guera na Ukraine no a termina.
Manera DIARIO a informa Aruba na tanto ocasion, te awor ta un realidad cu ni Rusia ni Bellarus por participa na Weganan Olimpico.
Pa Gobierno Hulandes ta keda atras e pregunta con Ministro di Defensa y Gobierno Hulandes ni mando militar Hulandes tabata na haltura cu e militarnan Hulandes cu ta parti di Guera Ukraine, por a topa den encuentro amistoso di deporte cu Rusonan!
