Por topa Robby Schouten pa e firma su buki di mas nobo

“Entre 2 Continente”

ORANJESTAD (AAN): E tin un buki nobo!  E gran personahe Robby Schouten ta lanzando e buki ‘Entre 2 Continente’.  E buki aki lo bay ta obtenible na Super Food na Aruba.

   Segun Robby a splica, despues di hopi contratiempo, manera scarcedad di papel pa imprimi e buki, y a tarda pa yega Aruba na tempo, tambe cu algun trahado di imprenta a haya Covid-19, por bisa awor porfin cu "Entre 2 Continente" ta sali.

   E buki aki lo ta un biografia di dje y di su experiencia despues di 56 aña na Telearuba y 54 aña na TeleCuracao.

   E biografia tambe ta trata di su famia y e pueblo di e islanan Hulandes den Caribe y esnan leu fo'i cas bibando na un otro parti di mundo. Banda di esaki, lo tin hopi tema interesante di mi bida y ademas di nos hendenan di nos islanan.

    E storia di “Entre 2 Continente” ta cuminsa na aña 1895, segun Robby a indica na DIARIO.

   Ademas di Super Food na Aruba, e buki ‘Entre 2 Continente’ di Robby Schouten lo ta obtenible na diferente Boekhandel tambe.

   Robby mes lo ta presente na Super Food riba Diasabra y Diadomingo for di 10’or di mainta te cu 2’or di merdia pa firma e buki.  E lo ta na e Food Factory pa haci esaki.  Ademas como un special, miembronan di Super Food lo haya e buki aki cumpra na prijs mas atractivo.