Minister Dangui Oduber --- *Hulanda ta cla pa anuncia eliminacion di tur medida
ORANJESTAD (AAN): Minister di Turismo y Salud, Dangui Oduber a duna di conoce diabierna atardi, ora cu a anuncia e proximo 'Parada Nacional di Luz' cu e intension pa organisa e parada aki ta pa esaki bira un celebracion di pais Aruba y pa Aruba demostra di ta un trendsetter den determinacion pa bolbe bek na normalidad.
Ta wak cu esaki ta wordo haci no solamente na Aruba ya cu e estadisticanan ta conduci cu por tuma e decisionnan aki di bolbe bek na normalidad.
Ora cu a anuncia e 'exit strategy' na luna di Januari, e punto principal di esaki tabata pa elimina tur medida. Gradualmente ta keda suavisa, pero e meta final ta pa elimina tur medida, Oduber a remarca.
For di Januari te cu awor, por conclui cu ya caba Aruba a bolbe bek na normalidad cu excepcion di e orario di ciere cu ta 1 am y cu excepcion cu ainda ta mandatorio pa uza tapaboca paden di establecimento, a splica.
E mandatario a sigui bisa cu esaki ta e dos medidanan cu tin vigente ainda y cada siman ta evalua y a base di e evaluacion, CrisisTeam ta tuma un decision si tin necesidad pa sigui flexibilisa.
"Bao di e circunstancianan cu nos ta bibando aden actual, nos por na un forma responsabel los y suavisa tur medida y move e orario di ciere tambe. Pero esaki ta algo cu lo mester wordo discuti den CrisisTeam y finalmente un decision mester wordo tuma si mayoria cluster ta di acuerdo cu e proposicion pa elimina tur medida manera tur otro pais ta haciendo den e ultimo siman siman", a bisa.
Oduber a señala cu dia 25 di Februari, Hulanda hopi probabel ta bay anuncia cu ta elimina tur medida. Pesey ta momento pa bolbe bek na normalidad pero mester tene cuenta cu e modelo economico, laboral, cultural, y pesey a tuma e decision cu por bay organisa un parada pa asina comunidad bini hunto despues di mas di dos aña.
Dangui Oduber a finalisa bisando cu den e caso di e parada, nunca tabata tin obligacion pa uza tapaboca den eventonan pafo, pero si paden. Pesey dificilmente ta bay obliga e personanan cu kier participa bisti tapaboca den un evento pafo. Esnan cu ta desea di bisti'e ta keda na nan discrecion.
