SIMAR durante kortgeding:
ORANJESTAD (AAN) – Diabierna mainta a tuma lugar e kortgeding cu Gobierno a entama contra e sindicatonan SIMAR y SEPPA, unda e lidernan sindical por a splica nan banda, y contesta preguntanan di Huez.
Esaki ta tocante e reduccion di 12.6% di e salarionan di empleadonan publico, cu ya pa casi dos aña consecutivo, gobierno ta retene y cu na prome instancia tabata pa crea un fondo di solidaridad durante e pandemia, pa yuda e grupo cu a perde trabao, den forma di loke a carga e nomber di FASE.
Sindicato SIMAR a splica na medionan di prensa ta, cu alomenos un parti a sali afo y ta cu Land Aruba a admiti cu ta Aruba a bin cu e 12.6% y cu no tabata exigencia di Hulanda, y eynan caba ta un logro pasobra cada bez den prensa gobieno ta bisa cu no ta nan, cu ta Hulanda.
T ambe Huez a keda puntra Land Aruba cu nan ta bisa cu nan ta bezig cu algo structural, y sinembargo a pasa mas cu 22 luna, sin cu a mira ningun cambio structural.
SIMAR ta hopi gradici na su abogado mr. David Kock, cu a trece nan puntonan hopi bon pa dilanti, unda cu el a mustra cu gobierno a bisa cu ta algo temporal, y cu temporal mester keda.
Si wak e panorama di 2020 cu 2022 no ta mes cos pero ta leu foi otro. SIMAR ta sinti cu gobierno no ta completamente honesto, pasobra nan ta bisando cu e empleadonan publico por haya 5% bek, cu ta placa, y nan kier kita dia for di nan, cu no ta costa ningun placa, y esey ta mustra cu gobierno tin placa. Pesey ora nan ta sali bisa cu e situacion ta precario, e no ta cuadra pasobra nan kier duna placa a cambio di dia.
Huez a bisa e lidernan sindical cu te dia 2 di Maart nan ta bin Corte bek, pasobra e mester tin tempo pa studia tur cos bon, anto e por yama nan prome pa wak si tin pregunta, of e por tin un tussen besluit of un een besluit, pero en todo caso nan a duna un stap padilanti, unda cu Huez a pone presion riba gobierno cu nan no por keda bisa cada bez cu nan mester finanzas y cu nan ta wardando, pero ki solucion structural tin, como gobierno, pa e clase trahador cada luna nan kier kita di nan.
Segun SIMAR, eynan gobierno no por a duna un contesta, y ta keda bisa cu nan ta bezig. Gobierno a bisa Huez cu esaki no por cambia den dos dia, y Huez a contesta cu nan no ta 2 dia bezig sino 22 dia bezig. Den direccion di gobierno Huez a mustra cu nan no por keda “corta” riba hende, anto sin bin cu nada structural.
E sindicatonan ta keda positivo cu na Mart, ora e caso bin bek, nan por mustra cu loke nan ta pidiendo pe no ta malo ni inhusto, pasobra pa 22 luna caba nan ta trahando cien porciento pero ta cobra 87.4%, anto gobierno ta aplica riba nan “no work no pay” pero nan kier “no paid work” loke no ta logico tampoco.
