Ministerio Publico:
ORANJESTAD (AAN): Riba 3 di augustus ultimo, durante transmision di e programa ‘Enfoke’, e presentadornan a haci algun ponencianan incorecto.
Durante e transmision a, entre otro, papia tocante e screening di ministernan di e gobierno actual. Ey a crea e sugestion cu e Procurador-General no a haci e screening bon, pasobra e Alto Comisario di Polis di esten tampoco lo a haci su trabao bon.
Durante e transmision un di e moderadornan a mustra specificamente un ehemplar di e Landsverordening integriteit ministers di aña 2021 y a referi na articulo 3 di e Landsverordening aki.
A base di e articulo Procurador-General mester duna informacion hudicial durante screening y, pa intervencion di Alto Comisario di Polis, informacion relevante cu ta den existencia den Cuerpo Policial.
E Landsverordening aki a drenta na vigor riba prome di januari 2022.
Gabinete Wever-Croes II a keda instala riba 20 di september 2021. Pues e screening di ministernan no tabata basa riba e Landsverordening menciona aki, sino riba e Landsbesluit screening ministers di 9 di september 2013.
Den articulo 2 di e Landsbesluit aki ta unicamente duna ordo na Procurador-General pa haci referencia den e registro di documentacion hudicial (e asina yama carchinan di castigo). E Landsbesluit ta regla tambe cu e Procurador-General mester limita su mes na casonan finaliza cu a hiba na un condena penal.
Esey kiermen cu e ponencianan cu a wordo haci durante Enfoke tocante e screening di ministernan y e rol di e Procurador-General y e Alto Comisario di Polis ta incorecto. Lamentablemente comunidad di Aruba a wordo mal informa.
Periodismo confiable ta di gran importancia pa sociedad democratico, cu no por funciona bon sin ciudadanonan informa y un intercambio liber di ideanan y pensamentonan.
Den e sociedad habri aki e periodista tin e derecho na busca noticia na un manera liber, y e tin e responsabilidad pa trece noticia veridico, independiente, fair y cu visor habri.
Den e transmision menciona di Enfoke tocante e screening di ministernan no por papia di esaki, pasobra tabata falta verificacion di e hechonan. Tanto e Landsverordening menciona previamente (di prome di januari 2022) como Landsbesluit (di 9 di september 2013) por wordo haya relativamente facil riba internet.
Menaza periodistanan
Diabierna ultimo 4 di augustus un persona a keda deteni riba ordo di fiscal di husticia, pasobra el a menaza presentadornan di Enfoke cu morto. Esey relaciona cu un of mas transmision di Enfoke siman pasa.
Ministerio Publico no ta tolera na ningun momento menaza contra periodistanan. Periodistanan mester por haci nan trabao den libertad. Libertad di prensa ta wordo limita pa ley y no pa individuonan cu ta tuma derecho den nan mes man.
