Sacha Geerman, Policy Advisor na DAS:
ORANJESTAD (AAN) – Den entrevista cu Sacha Geerman, Consehero Politico na DAS, el a subraya cu enberdad ta hopi importante, no solamente pa tin guia, pero sosten na mayornan pa guia e mayornan cu e tecnologia.
Por ehemplo, siña e mayornan con pa anda cu tecnologia, depende di e mucha su edad. “Por ehemplo, nos ta bisa e hobennan con nan mester comporta nan mes, den e mundo fisico; mayornan ta coregi nan yiu con pa bisti nan mes, sinembargo mi no sa si tin suficiente informacion pa guia nan yiunan con pa comporta nan mes, den e mundo digital. Kico bo ta bisa den e mundo digital, kico bo ta profila bo mes. Por ehemplo, e topico di sacamento di potret sunu, mitar bisti, of e tipo di cosnan asina, si e temanan aki ta wordo trata suficiente den cas.
Anto, mi ta kere cu den esey si, mayornan mester haya mas sosten pa yuda nan pensa tambe, riba kico tur ta sosode den e mundo digital aki, cu nan tin cu yuda nan yiunan, guia nan y hasta pone regla riba e cosnan cu no tin mag di haci. Por ehemplo, cu no tin mag di saca potret di nan curpa sunu of mitad sunu y pone riba plataforma. Mescos cu den e mundo fisico e yiu no mag sali pafo di cas sunu of mitad sunu”, Sacha Geerman a remarca.
Awo tin cu traduci e reglanan cu ta conta den e mundo fisico pa e mundo digital. El a agrega cu ta mescos tambe cu siña a yiu cu e no mag papia cu hende straño manera desde chikito mayor ta siña nan. “Den e mundo digital, e mundo fisico ta haya un forma invisible, cu e mayornan mester haya un poco sosten, di con nan ta stipula e reglanan y con pa guia nan yiunan, pa e mundo digital aki. Pero pa esaki sosode mayor mester tin un relacion habri cu e yiu, pasobra si no, e lo no bise pasobra e no ta wak’e tur ora y mayor mester sa con e relacion di su yiu cu e mundo digital aki, ta”, Sacha Geerman a señala.
Finalmente, Geerman a duna di conoce cu e Comision lo traha riba Husticia Hubenil pa e fin di aña aki y pa otro aña, pasobra e periodo dilanti ta cortico. Pero den e siguiente lunanan lo papia riba e plan, y kico exactamente lo bay enfoca riba dje.
