Cuerpo Policial no ta tolera violencia
ORANJESTAD (AAN): No kere pasobra bo ta expresa insultonan, acusacionnan grave, of hasta menaza contra bida di otro hende na forma ‘anonimo’, cu bo ta liber di ta violando leynan valido na Aruba. Esey no ta berdad, y momento a yega pa bo saca bo mente di esey, y enfrenta realidad! Y si bo a haci esey, bo tin di ta prepara pa bay asumi responsabilidad, y bay sinta riba e blaar.
Vocero Policial Liliana Rasmijn, a comenta na DIARIO cu den e ultimo dianan Cuerpo Policial di Aruba a bin ta tuma nota di un pagina social riba Instagram cu yama “auaconfessions2.0”.
Comentarionan fuerte: Segun Rasmijn, a sali na cla cu den un forma anonimo “cierto comentarionan” ta wordo publica riba e pagina aki di social media.
Oficialnan di Cuerpo Policial na Aruba, ya caba a tuma nota di cierto comentarionan cu por ta castigabel pa ley y cu por tin consecuencia grave pa esnan cu ta publica e comentarionan aki como tame pa e moderador di e pagina aki.
Pa e motibo aki, riba Diabierna mes, Cuerpo Policial di Aruba a manda un advertencia fuerte na cualkier persona cu ta uza e rednan social cu no lo tolera tipo di comentarionan cu contenido di violencia mirando cu esaki por tin consecuencia serio y negativo pa esnan envolvi.
Atencion pa caso: Segun Rasmijn a splica, cu Cuerpo Policial na su turno tin atencion riba tipo di paginanan aki cu nan contenido cu por ta castigabel pa ley manera menciona y sigur lo bay actua contra esakinan.
Corda bon cu en general, tur compania di Social Media ta semper dispuesto pa coopera cu autoridadnan policial di tur pais, incluyendo Aruba. Si abo ta kere cu bo ta purba di ta scondi y saca bo gal sinta dilanti bo smartphone of un keyboard di computer... djis corda cu nan ta haya sa tardi of trempan ta kende bo ta.
Y den pasado ya diferente persona a wordo aresta pa cosnan fo’i sla cu nan a yega di expresa via social media.
