Minister di Husticia y Asunto Social Rocco Tjon:
ORANJESTAD (AAN)—Minister di Husticia y Asuntonan Social, señor Rocco Tjon, tambe a hiba palabra durante e Conferencia di Prensa, relaciona cu e firmamento di contrato entre Wit Gele Kruis y cinco candidato pa bira POH-GGZ, cu ta bay cuminza nan opleiding entrante 1 di September 2024.
Minister Tjon a expresa cu esaki ta un momento hopi mas importante, cu ora di inaugura un edificio of ora adkiri material. “Pasobra e intencionnan aki, den boso, e profesionalnan ta haci posible cu e ta bay tin un impacto positivo y significante, den bida di e ciudadanonan cu mester di e cuido di salud mental”, e dignatario a bisa. Y seguidamente, el a yama danki na tur e partnernan cu ta forma parti di e stuur groep GGZ. Pasobra e opleiding aki, no a cay for di cielo.
El a agrega cu e prome Praktijk Ondersteune dedica na e parti di GGZ a wordo op geleid a base di un proyecto special di Crisis Plan. P’esey e ta contento cu a dicidi di sigui cu esaki, y hopi gradici tambe na AZV, cu por sigui brinda e servicio aki.
“Ora bo wak e parti di salud mental, ta importante cu bo tin e vision y un maneho, pero mas importante ta pa bo profesionalnan cu ta kere den e vision y e maneho, y ta dispuesto tambe pa ehecuta esaki. Riba esey mi ta hopi gradici na e stuur groep di GGZ cu ta consisti di tur e partners den e cadena, no solamente e parti medico, pero tambe e parti social, pasobra ta hunto so nos por enberdad haci un cambio pa loke ta trata e cuido aki”, minister Rocco Tjon a señala.
E maneho ta consisti di e parti di prevencion y e di dos pilar ta consisti di amplia e servicio y hacie mas lihe y accesible, e mandatario a splica.
