ORANJESTAD (AAN): Pa e ultimo 2 añanan Nando Chirino ta trahando ariba un Proyecto Musical,
cu ta un EP di evergreens - cover songs den e genero kompa. Titulo di e EP aki ta “Something to remember & Something to forget”.
Na aña 2022 Nando a lansa e prome cancion pa e EP cu ta; “To love Somebody” un cancion den e estilo kompa cu a wordo acepta en grande aki na Aruba y tambe na Boneiro, Corsou y Surnam. Te dia di awe e cancion “To love Somebody”, ta bon resona na radio emisoranan y bon toca den fiestanan y conciertonan pa nos bandanan local y DJnan. Nando a continua cu lansa mas cancion pa su EP y asina a bin cu e tema “Ain’t no sunshine”, “Turn your lights down low”, y awor e momento a jega pa lansa e cancion nobo, titula “Sealed with a kiss”, cu ta originalmente di “The Four Voices” un cancion di 1960.
Actualmente Nando Chirino ta na Aruba cu vakantie y a combina esaki cu promocion pa su cancion nobo. Asina Nando ta bishitando diferente radio emisora y canalnan di TV. Y ta aki na Aruba ela lansa e cancion nobo pa prome biaha. Areglo di e tema nobo aki ‘Sealed with a kiss’’ a wordo hasi pa Stanley Clementina, e final mix/master a wordo hasi pa Sean Cannister y e recording studio ta Steez Music un studio cu Nando tin conhuntamente cu Stanley Clementina na Hulanda. E videoclip no a sali ainda, ya cu esaki lo wordo graba aki na Aruba.
“Sealed with a kiss” ta ariba tur plataforma digital, manera YouTube, Spotify, Apple Music y Distrokid. Falta un cancion mas pa e EP ta completo, esaki ta wordo lansa den luna di December. Nando ta sumamente contento y agradecido, en especial na e pueblo di Aruba pa e sosten y pa acepta su cancionan den e genero kompa.
