Plataforma 'Falsidesk' a wordo introduci pa ehecucion di control na frontera

Director di Inmigracion Andrew Hoo ta splica:

ORANJESTAD (AAN):  Director di Inmigracion Aruba, Andrew Hoo a duna di conoce cu dialuna a haci un presentacion di loke ta e plataforma Falsidesk, cual ta un combinacion entre Inmigracion Aruba y Koninklijke Marechaussee.

            E plataforma a nace dos aña pasa den cuadro di e implementacion di Landspakket. For di esey tabatin e protocol 'versterkt grens toezicht y un otro nivel tabata pa traha un plan pa cuminsa implementa e control na frontera di Aruba.

            Hoo a splica cu un di e condicionnan tabata pa haya sosten di Koninklijke Marechaussee, e grens dienstnan y Migracion Aruba. A haya un grupo di Marechaussee cu ta traha conhuntamente pa algun tempo defini.

            Esaki ta un plataforma unda e personal di Inmigracion ora cu e tin duda riba e autenticidad di un documento, sea un paspoort, visa of un permiso di DIMAS of e identidad di e persona, cu e ta pas'e over pa un di e expertonan di Falsidesk cu hunto cu Marechaussee y Inmigracion local ta prueba e autenticidad di e documentacion, a indica.

            Andrew Hoo a laga sa cu el a lesa den medionan di comunicacion cu ta bay tin e posibilidad pa biaha sin paspoort. Sinembargo, el a indica cu e leynan na Aruba ainda un hende mester biaha cu su paspoort.

            El a menciona por ehempel, kico lo pasa si un dia tin problema cu tecnologia? Pesey ta importante e documento di biahe pa confirma e identidad di e persona pa medio di su paspoort. "Bo tin cu keda bin cu bo documentonan", a remarca.