Historia ta dal un buelta increibel pa Reino Hulandes na 2023
*Ministro cu a baha Mike for di Fort Zoutman, por bira “verkenner”
*Alexandra y e problema cu no ta LAFT pero su exigencia RAFT
ORANJESTAD(AAN)—Ora analisa e sucesonan di ultimo 48 hora den Reino, mester papia di un mundo di Mil maraviya, cu hende sigur lo no por a pronostica.
Eleccionnan Hulandes a bira e sorpresa grandi pa cual DIARIO a adverti, pero hasta a surpasa tur expectativa pa bay marca historia.
Final di 2023, cu no tabata intenciona den historia pa bira momento di importancia grandi den Reino, a resulta di bira temporada di sorpresa tras sorpresa despues cu Mark Rutte a dicidi cu e ta retira como Prome Ministro Hulandes prome cu su tempo a yega segun sistema electoral Hulandes, aunke el a evita asina cu e barco Hulandes lo a zink cu su persona como capitan cu a marca record.
Pa analisa realmente loke ta pasa den Reino, mester na prome lugar conclui, cu hopi bez pa skirbi historia, mester di loke a pasa ayera, pa trata na comprende loke por pasa awe.
Cu Geert Wilders, e revolucionario cu hopi bez a bisa loke otro hende tin miedo di bisa, lo a presenta sorpresa, por a spera sin mas sigur despues cu sigur e partidonan liberal manera di Rutte, cu no ta fu ni fa, a pone nan barco pega den duin.
Nos no ta di acuerdo cu ponencianan abusivo di Wilders, pero ora analisa informacionnan cu ta drenta tras otro, e factor di sorpresa, sigur ta presente.
Si Geert Wilders no a gana eleccion na e forma cu el a gana, lo por a tene su persona for di formacion di Gobierno.
Tene Geert Wilders for di Gobierno na e momentonan aki cu e tin e mayoria aplastante di voto, ta un peticion pa problema grandi na Hulanda, cu manera nos a bisa caba, a bira escenario di sorpresa.
Pa forma Gobierno di Geert Wilders, hunto cu un grupo grandi na Aruba, nos a spera un figura controversial, cu lo a pone tur hende bay sconde den cashi of bou cama.
Grandi tabata e sorpresa ayera ora a wordo anuncia, cu Geert Wilders tin intencion pa apunta como “verkenner”, nada mas y nada menos cu Ronald Plasterk, cu ta bon conoci na Aruba.
Ronald Plasterk tabata e politico cu a bini Aruba pa baha Mike Eman for di Fort Zoutman y pone Mike Eman sinta na mesa y acepta e reglanan di Hulanda pa goberna bou supervision.
Ronald Plasterk, e tempo tabata Ministro Hulandes encarga cu Relacionnan den Reino y despues a desaparece for di noticia pa e sigui cu su actividadnan.
Awor Wilders a bolbe pone riba plataforma di Reino y segun tur informacion si Plasterk acepta, e ta bira e “verkenner”cu ta sondea e posibilidadnan pa formacion di Gabinete Wilders.
DIARIO ta pone e situacion aki den e analisis di e presentacion e siman aki di Alexandra van Huffelen, cu a splica e forma cu el a atende tur e problemanan di Aruba cu na ultimo momento el a presenta cu un blackmail cu Gobierno Wever-Croes no por a acepta.
Van Huffelen a presenta su mes como e persona di logro grandi, aunke te awor e RAFT cu ta supervision a base di un Ley di Reino, no a bira su logro aunke a bini cambio den e LAFT, cu ta un Ley Arubiano cu un contenido cu ta proteha Aruba contra produccionnan registra durante Gabinete Mike Eman.
Den e LAFT ahusta lo ta acorda aparentemente pa no bini proyectonan manera PPS, cu a hinca Aruba den un debe cu hasta nietonan di e actual ciudadanonan di Aruba mester paga.
Manera, Prome Ministro Evelyn Wever-Croes na tanto occasion a trece dilanti, den e LAFT, Aruba no por wordo sorprendi cu loke Reino dicidi.
Cu sorpresa den Reino por lo pronto lo no termina, a keda proba atrobe na momento cu ayera a bira conoci cu Geert Wilders kier nombra Ronald Plasterk como su “verkenner”pa un Gobierno cu su nomber.
Algo cu ta sigur ta, cu Professor Ronald Plasterk ta goza di confiansa den Reino a base di e forma cu el a presenta su mes na uno di e momentonan mas dificil, cu tabata e momento cu Mike Eman a surpasa tur hit di hasta Wilders, cu su huelga di hamber den Fort Zoutman cu henter Aruba en espera di e momento cu Mike por a muri di hamber.
Na un momento dificil atrobe den Reino, su nomber ta resona atrobe pa habri un dimension nobo pa Aruba y Reino, a corto plazo.
