ORANJESTAD (AAN): Diasabra atardi banda di 4:35 pm, un unidad di Polis di San Nicolas a ser manda na Mangel Halto debi cu tin un turista perdi riba lama.
Ora cu Polis a yega eybanda, nan a papia cu e casa di e turista Mericano.
Polis a nota cu e turista femenino ta basta altera, y nan a trata na calme. El a bisa cu nan ta abordo di un Barco Crusero, y a bin eynan y e tabata den lama ta snorkel cu su casa S. di 27 aña. Nan tabata pafo di rif pazuid di Mangel Halto.
Dado momento e señora a cansa di snorkel, y el a dicidi na bay bek na beach, pero su casa S. a keda snorkel debi cu e kier a bay na e Boei unda e barco ta den lama.
Despues e señora a ripara cu su casa no tey mas den lama. Pesey el a bay den panico y cuminsa pidi pa yudansa.
Pero un poco despues, ata nan a logra di topa cu e homber S. bek.
El a declara cu e tabata snorkel y diripiente coriente fuerte di lama banda di e Boei, a cuminsa pushe bay direccion pabao y casi a yega na e Pier di e Rif.
E homber a admiti cu e tambe a bay den panico, pero el a keda mantene su mes calmo y despues di un rato el a logra di cuminsa landa bay direccion panort rumbo pa e beach na Mangel Halto.
Esaki a pone dura basta pa yega cu e landamento aki. Polisnan a mira cu e ta mustra di ta bon sin ningun problema.
Funcionario di Bureau Slachtofferhulp tambe a yega eynan pa asina brinda asistencia na e turistanan. E turistanan a keda contento cu e sosten, y cu Taxi a bay bek Playa pa nan barco crusero.
