Piscina di glas a kibra na Hotel di Curaçao heridando 8 turista

WILLEMSTAD: Un caso hopi serio a keda registra Diahuebs na e hotel di Sandals Royal Curaçao,

ora cu diripiente nan famoso “Pool” cu rand di glas, a rementa y a colapsa completamente.

   Esaki a pone cu diferente turista a resulta herida, ora cu e glas aki a kibra, bashando abao riba beach, y tambe den e piscina mes.

   Mesora yamada a ser haci na Polis y tambe Ambulans cu a acudi rapidamente na e hotel aki cu ta keda net banda di Santa Barbara beach, cu ta situa na zuidoost di e isla.

   Polis a bisa cu nan mes a haya yamada banda di 5:35 pm, di e incidente grave na Sandals Royal Curaçao.  Autoridad a yega y bin topa cu e piscina cu muraya di glas parcialmente kibra, y varios herido.

   Vocero di Polis a bisa cu e investigacion preliminar a indica cu tabatin un Pool Party e momento ey, y posiblemente tabatin demasiado hende den piscina.

   A consecuencia di esaki, parti di e glas di e pool a kibra, y en total 8 turista a resulta herida.  Algun di e victimanan a wordo transporta cu urgencia pa Curaçao Medical Center, y algun di nan tabatin corta grave, cu nan mester a bay den sala di emergencia mesora.

   Prome Ministro Gilmar Pisas tambe a acudi na e Hotel pa asina mira kico a socede.  Aki e Management team di Sandals Royal Curaçao a bisa cu nan ta dunando tur atencion na esnan cu a wordo herida.  A splica e mandatario cu e turistanan no a keda gravemente herida.

    Ministro di Turismo, Ruisandro Cijntje tambe a expresa su preocupacion, pero a trata na defende e Hotel.  El a haci esey debi cu Diabierna henter dia, pueblo di Curaçao tabata manda mensahenan negativo cu hopi critica riba Sandals Royal Curaçao.

   Ministro Cijntje kier a recorda tur curasoleño, con importante e sector di turismo ta pa e isla.  Diahuebs mes CTB a publica cu Curaçao a sobrepasa cifranan di turismo pre-pandemia y esaki ta netamente debi na loke nan ta yama e ‘Sandals Effect’.

   Sandals ta dirigi su mes netamente riba mercado Mericano cu Gobierno kier pa drenta y engrandece turismo, y nan mester ta conciente cu e noticianan aki ta yega na e mercado ey tambe, y cu e lo stroba desaroyo positivo pa e isla.

   E ta pidi esnan cu ta criticando sin fin, pa nan stop cu esey, mihor bay traha hunto, scucha otro, y respeta otro.  E potretnan aki a wordo comparti door di Facebook pa rond mundo caba.