ORANJESTAD (AAN): E dianan aki por nota cu e stof di Sahara cu ta plama den atmosfera riba Aruba, ta bastante denso.
Riba esey, un piscado local a mustra cu riba tera mes bo por mira e “capa fini” cu ta haci e.o. seronan di Yamanota y Arikok, y tambe Hooiberg mustra bastante dof den bo bista.
Pero e ta indica cu riba lama, ta parce cu e efecto aki ta aun mas pisa. Pa awor e ta manda un conseho pa tur esnan cu tin boto chikito, subi lama cu cautela y no aleha mucho di costa, debi cu bista lo bay ta basta limita en general.
E stof di Sahara aki tambe ta bira un peligro pa salud di hende na Aruba, como cu e por acelera problemanan alergico y respiratorio cerca personanan cu ta biba cu e condicionnan aki, of e por aumenta problemanan di asthma. Pues pa e dianan aki, no neglisha bo tratamentonan y si bo sinti dificultad di hala rosea, pa core busca yudansa medico.
Ademas di esey, mirando e hecho cu temperatura den dia ta banda di 34º Celsius, y tin biaha e index di calor ta sinti comosifuera ta 40º Celsius, ta recomenda publico pa usa paña liviano, bebe cantidad di liquido, y trata di no cana den rayonan direct di solo entre 10:00 am y 4:00 pm.
E fenomeno di e presencia di stof di Sahara ta socede regularmente den lunanan mas calor, y e ta forma un atmosfera seco y hopi cayente, y e particulanan aki por hasta ocasiona iritacion momentaneo y temporal den bo wowonan. Evita di frega bo wowo cu bo mannan, debi cu e por ocasiona conjunctivitis.
Pashentnan cu ta sufri di cualkier condicion, manera asthma y alergia respiratorio, pa usa e dianan aki tapaboca y sigui mesun medidanan di higiene cu a ser recomenda durante e pandemia di Coronavirus.
Corda cu e stof ta bin di e desierto di Sahara na Africa, y esaki tin e paricularidad di acumula un nivel halto di componentenan biologico cu ta zweef hunto cune, y esaki ta inclui beskem, virus, bacteria, y insectonan hopi chikito, di cual hopi por transmiti diferente malesa. E potret aki ta uno di archivo.
