ORANJESTAD (AAN): E ta un persona kende den pasado a yega di organiza fiestanan grandi pa comunidad a disfruta y pasa momentonan divertido.
E tabata e voz cu tabata anima diferente emisora tambe local, cu musica y entretenimento.
Pero awor debi na su salud, e tin mester di yudansa di comunidad pa por sobrepasa obstaculonan pa haci pago pa cierto procedimento medico den exterior.
Ta trata aki di Chando Colina, kende un biaha mas ta na Colombia en busca di su salud. Pa por dune e respaldo necesario, amigonan di dje a dicidi na organiza Diadomingo venidero, esta 19 di Mei 2024, un evento di Radiothon pa yuda recauda fondo.
E Radiothon aki lo bay ta for di 10:00 am te cu 6:00 pm, y lo bay tuma lugar na Coco Loco Beach Bar na Eagle. Ya caba tin 7 banda musical cu a duna reaccion mesora pa bay anima e evento, stimulando publico pa haci donacion.
Lo bay tin Shine Music, ‘N Fuzion, Tsunami, Rincon Boyzz, Robert Jeand’or y su Solo Banda, Musical Time, y Impact Band.
Tambe lo tin varios DJ cu ta yuda, esta DJ Mike, DJ Edson, DJ Chando W., DJ Alvin W., y DJ Pitufo.
E lo wordo transmiti via di Blue FM, Cool FM, HeartRadio, Latina FM, Magic FM, Mix Live FM, y Top 95 FM. Tambe lo tey riba algun website.
Esnan cu kier contribui direct pa e cuenta di banco, por haci esey na cuenta di Alexander Ridderstaat, na Aruba Bank account #585.770.0190.
