Personanan clave ta comparti nan historia y impacto den e desaroyo di Biblioteca Nacional

ORANJESTAD (AAN):  Durante celebracion di 75 aña di trabao di Biblioteca Nacional tabata masha bunita

pa mira presencia di algun persona cu ya caba a bay cu pension mereci y otronan cu ta mantene activo ainda y cu ta forma parti di e bunita historia di e institucion.           

BETTY GOELOE: Un di e personanan aki ta Sra. Betty Goeloe. El a cuminsa traha na aña 1967 den e departamento di Administratie pa yuda hende cu tur cos cu tabata tin mester y tambe den Catalog, pa drecha buki y pa e bukinan sali den catalog.

            Despues el a bay Departamento di Arubiana. Na 2012 el a bay cu pension despues di a traha 35 aña normal y 10 aña como boluntario.

            Betty a expresa di ta masha contento pasobra biblioteca ta bay dilanti. "Bo a traha eynan y bo sa kico esey ta nifica".

            Betty tambe tin masha bunita recuerdo di e proyecto di conta storia na cas di e grandinan. El a bisa cu e biaha aki a puntr'e si e tabata kier conta storia. Nunca el a yega di conta storia, a bisa pero el a dicidi di hacie y bay bisti cu bisti cu paña estilo madushi. "E tabata leuk", a bisa hopi emociona.

            Betty semper a caracterisa te dia di awe pa ta un persona hopi servicial y amabel.           

GRACIELA NEDD-CHENG: Un otro persona cu tin basta aña trahando como documentalista na BNA ta sra. Graciela Nedd-Cheng. DIARIO a puntr'e kico ta nifica p'e e celebracion aki.  

            Graciela a conta cu su persona hunto cu directora sra. Astrid Britten a gradua na e mesun aña na Den Haag y nan a haci un specialisacion como blibliotecario-documentalista.

            Na december 2000 el a cuminsa traha na biblioteca publico y despues di mas o menos 3 aña el a wordo transferi na San Nicolas unda el a traha 7 aña. Na 2010 el a cuminsa traha na Departamento Arubiana eherciendo su trabao como documentalista.

            El a bisa cu den e añanan aki el a wak hopi desaroyo. Biblioteca a bay hopi dilanti specialmente cu tecnologia.. E ta corda cu na 2004 e corantnan local a cuminsa sali riba nan plataforma online y el a tuma e oportunidad pa 'download' algun di e corantnan. Pesey tin varios corant online for di 2005.

            For di e tempo ey te cu awo tin casi tur corant digitalisa. Pocopoco ta digitalisando otro publicacionnan pa asina hende por tin acceso tur caminda, haci e buskeda y e investigacion mas facil, Nedd-Cheng a expresa. 

TICO BOEKHOUDT: Robertico 'Tico' Boekhoudt tin mas cu 20 aña trahando na biblioteca. Actualmente e ta traha na e departamento di Media, cu ta e servicio audiovisual.

            El a cuminsa traha dia 1 di juni 1986 y na 1988 el a bira trahado vast. Na 2002 el a bay traha den Media Dienst.

            Tico a laga sa cu traha na biblioteca semper a nifica avance y esey ta algo cu e ta gusta. El a bay curso y siña mas tocante camara, computer, entre otro. El a pasa den e procesonan tecnologico manera esun di tecnologia analoog pa tecnologia digital. Esaki a nifica un stap basta grandi pa loke ta mundo di media y informacion.

              "Un hende puntra mi tocante di media prome y awo ta hopi cambio tin. Y m'a sigui cu e cambio. Ami no a para keto. Loke mi ta haciendo aworaki ta cu mi ta bezig cu digitalisacion locual ta nifica pone den forma digital tur e videonan cu tin pa bay riba Coleccion Aruba (www.coleccion.aw)".

            Mester remarca cu esaki ta un trabao grandi y cu ta nifica un proceso cu lo dura tambe su tempo pa asina tur video, documento of potret por ta debidamente accesibel den forma digital riba e plataforma di Coleccion Aruba.

            Ya caba biblioteca ta hopi leu, a remarca y e ta hopi contento di por ta parti di e proceso aki cu ta contribui cu e 'baggage' di conocimento di e generacion actual, pero sigur di e generacionnan futuro.

            Den un otro articulo lo comparti mas historianan bunita.