Peregrinacion y Caminda di Cruz di Misa di Dakota pa Alto Vista ta cuminza awenochi 11’or

Noraida Croes, miembro di e Comision:

ORANJESTAD (AAN) – Awe, Diahuebs Santo, ta tuma lugar e Peregrinacion y Caminda di Cruz for di Misa di Dakota te Alto Vista, saliendo di e plenchi di Misa di Dakota pa 11 or di anochi.

Noraida Croe, miembro di e Comision di Peregrinacion y Caminda di Cruz, a informa cu despues di e Santo Sacrificio di Misa di anochi, e peregrinacion ta sali. E ta wordo guia pa Polis, durante e canamento ta bay tin musica en bibo, tin oracion di Santo Rosario, Reflexion, y nan ta cana te pia di Alto Vista y eynan ta cuminza cu stagenan, cu ta e Caminda di Cruz mes.

Noraida Cruz a indica cu ta recomendable pa bisti paña comodo, keds, pasobra ta un caminda basta largo, bin cu boter di awa, foco pa ilumina e caminda, pero tambe e comision ta hiba Jug. Lo bay tin wc tambe pa esnan cu mester di esaki y un mini van pa esnan cu ta den edad un tiki mas grandi, cu si nan ta cansa hopi por sinta un rato descansa y despues ta baha sigui cana. Un sugerencia ta no bin cu mucha pasobra no ta algo pa nan den oranan di madruga. Pa hobennan si, nan ta recomenda pa participa, pasobra nan ta e futuro di nos FE y ta importante pa nan cuminza haci sacrificio y acompaña Jesus den momentonan asina.