E tabatin bolita di cocaina den su stoma
- Ocho biaha si el a pasa trankil cu droga
- Desde September 2022 e ta encarcela na Bruselas
ORANJESTAD (AAN): Un pasahero femenino di Aruba a wordo condena Diahuebs siman pasa door di Corte Coreccional di Bruselas na Belgica, na un castigo di 36 luna den prison, pa motibo di a haci su mes culpable na traficacion di droga.
E muher tabatin un bolita di cocaina scondi den su curpa.
Acusacion di Fiscal: Tabata riba un Diahuebs 23 di September cu e avion di Air Belgium a ateriza despues di un vuelo non-stop di Curaçao pa Brussels. Ora el a yega dilanti funcionarionan di Aduana, el a declara cu e no tin nada ilegal ta viahando cune.
Pero ora cu Aduana a puntre si e kier a haci un test di orina, a bin sali na cla cu e tin un bolita yen yen di cocaina den su vagina. E muher Arubiano a admiti esaki mesora, y a bisa cu e tin un otro bolita scondi den su anus, pero ora di a hibe Hospital, nada di esey a ser haya.
Den Corte, e muher Arubiano a bin cu e storia cu e tin problema financiero. Pero Ministerio Publico a mustra cu tin prueba, cu den ultimo lunanan e muher aki a viaha ocho biaha pa Curaçao, y semper ta bula su so. Y tur e ocho biahanan ey el a drenta Belgica trankil cu droga scondi den su curpa.
Defensa di Abogado: Den Corte, e abogado defensor di e muher di Aruba, a bisa Huez cu su cliente a nace na Aruba y e conoce hopi hende mes na e islanan ABC. Segun e Abogado esey ta e motibo cu e ta hiba hopi mercancia di Hulanda pa bende na e islanan aki, pa asina e bira un sorto di entrada pe.
Abogado a mustra cu sinembargo no obstante e bendementonan aki, toch e muher tin un debe grandi, y ademas e narcotraficantenan a eherce hopi presion riba dje, pa e cuminza transporta droga riba e vuelonan transatlantico aki. Toch Abogado kier pa Huez tene na consideracion, cu su cliente a sa di duna mesora tur su colaboracion na Ministerio Publico di Belgica, pa cu e investigacion di e caso.
Sentencia di Huez: Despues di tur e presentacion di Fiscal y defensa di Abogado, Huez a bisa cu e no ta mira motibo pa mustra indulgencia y compasion pa tur esaki, y su problemanan financiero. Pesey el a dicta sentencia mesora.
El a condena e muher di Aruba na un castigo di prison pa 36 luna largo.
