Premier Wever-Croes a splica: Pa dos aña largo no tabata tin inversion
*Lo aloca 4 miyon adicional inclui den presupuesto supletorio
ORANJESTAD (AAN): Premier Evelyn Wever-Croes a duna di conoce dialuna mainta durante e conferencia di prensa di gobierno cu careteranan na Aruba ta den mal condicion no ta un secreto.
El a splica cu e careteranan di asfalt di Aruba ta den mal estado pasobra pa dos aña largo no tabata tin inversion den loke ta careteranan. Ainda na 2020 tabata tin algun fondo pa uza, ora cu Covid-19 a aparece, pero pa 2021 y 2022 no por a aloca fondonan pa asfalt. Mester a aloca e fondonan pa salba bida di hende y pa atende cu e pandemia, cu e crisis, a enfatisa.
E mandatario a sigui bisa cu e prioridad a bay na e ser humano y no na e asfalt durante di e añanan aki.
Pero por mira cu cambio climatico na Aruba ta hunga un rol un tiki mas grandi, a señala. Temperatura rond mundo ta cambiando y na Aruba esey por haci cu tin mas yobida. Aruba no ta haya hopi molester di horcannan, pero yobida si a bira mas frecuente y mas fuerte, a bisa.
Esaki tin su impactonan riba e camindanan na Aruba. E ciclo di bida di un caminda ta bira mas cortico y tin cu mantene mas lihe y drech'e mas lihe.
Tambe ta mira cu den e ultimo añanan, prome cu e pandemia, falta di fondonan pa mantencion a haci cu e camindanan existente caba a cay atras pasobra no tabata haci mantencion preventivo. Mayoria di e fondonan a bay pa traha caminda nobo y no pa drecha e camindanan existente, a indica.
Den cifranan, Prome Minister a splica, ta mira cu na 2017 te cu 2020, tur aña rond di 5 miyon florin tabata bay pa asfalt. Un 70 % tabata bay pa caminda nobo y 30 % a bay pa mantencion.
Ya na 2021 y 2022 no por a aloca ningun fondo. Pa 2023, Parlamento a caba di pasa e presupuesto caminda a aproba 1.7 miyon florin pa cumpli cu esey y mirando cu e costonan a aumenta a percura pa aloca 2 miyon florin y esaki lo bay pa mantencion di careteranan, Wever-Croes a bisa.
El a agrega cu den su ministerio ta buscando den tur forma pa yega na fondonan adicional pa asina por aloca pa drecha e camindanan cu ta den mal estado y te cu ainda a logra un fondo adicional di 4 miyon florin cu lo wordo inverti e aña aki na mantencion di caminda. caminda nobo y na scolnan.
E suma aki lo wordo presenta na Parlamento den e presupuesto supletorio, e mandatario a duna di conoce.
Banda di esaki ta trahando riba plan di termino largo, riba kico ta locual tin mester cu inventarisacion di tur e camindanan na Aruba y cuanto placa ta bay tin mester pa drecha tur y caminda cu mester asfalta pa asfalta, a declara.
Esaki ta un plan cu ta bay dividi den 10 aña, cuminsando cu esunnan mas urgente prome. DOW tin un lista di criteria cu ta aplica pa defini cual ta mas urgente cu otronan. E plan ta bay keda cla pa fin di e kwartaal aki (maart) y banda di esaki tin cu mira con ta bay financia e plan di 10 aña aki.
