Pasadia Cas Marie a celebra Dia di Mama

ORANJESTAD (AAN) – Den entrevista cu DIARIO, señora Lissette Does, Coordinador di Pasadia Cas Marie cu ta un lugar pa personanan cu demencia, a elabora riba e celebracion di Dia di Mama, cu a tuma lugar Diahuebs caba.

Esaki pasobra durante dos aña di pandemia, e lugar a keda hopi keto sin actividad. Nan ta cera Diahuebs y nan a dicidi di pidi bishita di tur e famianan (casa, yiu, ruman), cu tin un ser keri den Cas Marie, cu ta forma parti di e famia di Cas Marie, pa bin pasa e dia cu nan.

Asina e personal encarga cu maneho di actividad a haci arte hunto cu nan ser keri, obra di man cu nan por comparti cu otro, y meneer Hassel a bin cu musica pa nan enjoy y balia. Na Cas Marie mes nan a traha snacks pa nan por comparti cu e clientenan y bishitantenan, y nan a come cuminda cayente manera famianan ta haci, y despues cada ken a bay traha.

Señora Does a splica cu esaki ta un mensahe pa mustra cu bo tin cu disfruta di bo ser keri, pasobra mañan cu e ser keri no tey mas, por disfruta di un bunita recuerdo cune, y esey ta importante.

E dama a comenta tambe, cu e casonan di demencia ta aumentando na Aruba y Cas Marie no por atende tur hende. Nan ta yudando awo ni un cuarto parti di e cantidad di personanan cu demencia cu tin na Aruba. Nan ta wak con nan por amplia mas dia, nan ta bezig cu esey. Does a agrega cu aña 2022 a habri hopi positivo, y activo. Nan a organiza un “Demencia Café” pa duna informacion na famianan y nan lo sigui cu esaki henter e aña. Nan ta informa hende con nan por guia nan ser keri cu tin demencia na cas, tanten cu no tin lugar pa trece nan na pasadia of un cas di grandinan. Pero e peticionnan ta hopi grandi y tin lista di spera tur caminda.