ORANJESTAD (AAN): Segun Partido UPP, den mas di 45 conseho for di aña 2014, CAft tabata urgi e gobiernonan di Aruba
pa cumpli cu palabracionnan haci y percura pa un "gezonde overheidsfinancien" y introduccion di e reglanan estricto di Bon Gobernacion.
Desde 2011 caba UPP a bin ta boga pa introduci reglanan di Bon Gobernacion, pero e hecho ta cu a scohe pa sigui goberna con cu ta. Prueba di esaki ta p.e. e cantidad di manipulacion den tanto e gobierno di AVP como esun di POREDmep. Y ta parce cu esun nobo lo no ta diferente.
Loke ta resalta ta cu sin ta formalisa, COHO i.o. ta haci loke e kier, mientras cu gobierno actual ta guli manda abao. COHO i.o. ta "in oprichting" y ainda no ta un entidad legalmente estableci.
Tin varios aspecto den e "Landspakket" cu UPP ta para 100% su tras, pero tin algun aspecto cu nan ta totalmente contra.
Partido UPP ta cuestiona pakico tin di bin cu cambio den leynan laboral y ley di LTU. Di con mester torno na e ley di retiro? Di con laga e fenomeno di "hire & fire" haci su entrada atrobe? Di con mester flexibiliza e LTU? Aruba no ta sobrecarga caba?
Den e "Landspakket Aruba" tin varios otro veneno cu Aruba a acorda cu Hulanda aña pasa, usando e pandemia como un "kapstok" pa hustifica e traicion di dia 13 di november 2020. Nos tur sa loke a ser acorda NO tin nada di haber cu e pandemia. Pandemia ta worde usa como un "smokescreen" pa tapa e malgobernacion y corupcion cu tabata tin den e gobernacionnan desde fin di 2009.
Atrobe djis pa ilustra algun ehempel di e "recolonizacion" di Aruba door di "Politiek Den Haag" UPP kier mustra p.e. den loke ta para den Cuido bow di Tema F.3.
Den campaña a fulmina contra tur esnan cu a trece padilanti cu ta e intencion pa introduci un "eigen bijdrage" y cu lo bay torno na e pakete di AZV. Te hasta a ser bisa "over my dead body", wel ate aki. COHO “i.o” a duna nan den nan "body"!
Despues di eleccion, e gobierno actual atrobe ta pasa e pueblo e cuenta pa malgobernacion y corupcion. Pa haya e fianza, e pashent lo no tin e mesun derechonan mas. E lo mester bay paga cada vez cu e kier bay su Docter. Di con MEP no a bisa pueblo esey den campaña? E pakete aki tabata conoci pa esnan cu tabata forma parti di e gobierno aki caba. Esaki ta "kiezersbedrog" den optima forma! Por papia ainda di integridad?
MEP a nenga rotundamente cu lo hisa e edad di pensioen. Es mas, a priminti cu esaki lo NO sosode.
Den e Tema E bou di E.5 ta poni hopi cla cu Aruba LO hisa e edad di pension na 2025 pa 66. Es mas, lo por keda sin haci esaki si un instituto apunta pa COHO i.o. indica otro. Ora sigui lesa ta bisa cu si resulta cu mester hisa e edad mas ainda lo haci esaki tambe y si mester lo introduci mas medida!
E veneno mas cruel ta esun cu ta scondi bou Tema B bow di B.2 y B.4! Aki e COHO i.o. posibelmente lo bay hiba empresanan estatal, cu no ta eficiente y no ta sirbi interes publico pa e altar di sacrificio! Ya caba partidonan cu ta conforma e gobierno aki a duna di conoce cu nan ta hopi liberal den esaki. Aki mesora UPP ta pensa riba e.o. Arubus y Serlimar.
UPP ta puntra si tin motibo ainda pa celebra Dia di Himno y Bandera. Nan ta convenci cu riba e fecha 13 di november 2020, e isla a perde tur e base pa celebra esey.
UPP ta convenci cu e fecha 13 di November mester ta un dia pa conmemora e "COHOnizacion" di nos pais. Poco poco nos lo bira un colonia di tempo moderno. E "kraaltjes en spiegeltjes" a worde cambia pa un "pulchi di placa"!
