Parlamentario Darlaine Guedez-Erasmus (MEP): ---ORANJESTAD (AAN): Den luna di juni 2020 te cu september 2020 a tuma lugar un nul-meting (investigacion) den e centronan di cuido di mucha.
Un total di 96 di e 121 centronan di cuido di mucha a participa na e prome investigacion aki. E enfoke di e investigacion aki tabata pa haya data riba e terenonan di: 1) Siguridad, 2) Salud, 3) Higiena, 4) Aspectonan Pedagogico y 5) Aspectonan personal.
E resultado di e investigacion aki ta duna un indicacion con e situacion y e servicio di centronan ta na e momentonan aki. Sigur no por kita afor cu tin centronan di cuido di mucha cu ‘best practices’ pero tambe e investigacion a señala aspectonan unda tin oportunidad pa mehoracion na bienestar di nos muchanan.
Na Aruba tin un Landsverordening Kinderopvang cu tin e reglanan tocante centronan di cuido di mucha. E ley aki ta uno anticua y no ta na vigor. Pero si tin un manual cu a wordo adapta desde 1 aña y mey pasa. Mirando e resultado di e nul-meting y e standard nan cu centronan mester tene cuenta cu ne a bini na un ahustacion di e Manual di Regulacion di Centro di Mucha.
Departamento di Mucha y Hoben (DMH) a haci un presentacion y tambe mi persona a sinta cu e centronan di cuido di mucha pa asina scucha kico ta beneficionan y desbentahanan cu e maneho/manual aki por trece cu ne. Dialuna awor e concepto mas actual di e manual lo keda presenta cu puntonan ahusta y di e forma aki por traha hunto na e bienestar di nos muchanan.
