Presidente di Parlamento Marlon Sneek:
ORANJESTAD (AAN) Presidente di Parlamento, señor Marlon Sneek, a declara den entrevista cu Matutino DIARIO, cu di Luna di Maart te aworaki, hopi cambio a wordo haci den Parlamento.
Aworaki cu oficialmente ta Aña Parlamentario 2025-2026, el a wordo reelegi. Parlamento tin diferente reto su dilanti, entre otro e reunionnan basico, pero manera ta conoci Aruba ta na caminda pa celebra 40 aña di Status Aparte, y den cuadro di esaki, Parlamento tambe kier ta hopi mas cerca di comunidad.
Presidente di Parlamento, den e cuadro aki, a menciona cu señor Richard Pronk ta e persona cu a gana e premio Hala di Shoco, cu ta un premio annual cu a cuminza e aña aki, unda ta pone bista riba un hoben ehemplar, cu a haci cosnan pa nos comunidad y a demostra cu e ta den e bida y den e mundo di comparti y duna bek, yuda su prohimo.
“Mi ta kere cu tur e Comision den e caso aki cu a scrutina tur e diferente nombernan cu a drenta cu e meritonan, a scoge den e proceso pa pone pa tres nomber y despues den sala a scoge e nomber di Pronk como e prome persona cu ta bay haya e reconocimento aki”, Presidente di Parlamento, Marlon Sneek, a relata.
Den e transcurso di e aña lo tin diferente reunion. Presupuesto a drenta caba, tin un fecha limite pa entrega pregunta cu ta e fin di Luna aki, pa despues bay over pa atende cu esaki den un Reunion Publico; banda di esey tin Rijkswet cu manera ta conoci tin diferente peticion pa cierto informacionnan cu Parlamentarionan ta pidi y asina cu tur e informacionnan ta entrega, entre otro e notulenan di diferente reunion cu tabata tin, prome cu e concepto di ley a wordo entrega. Ta bin diferente momento y ta pidiendo e notulennan aki tambe pa por uza nan na momento di reunionnan publico. Esey ta e dos “Highline” cu tin pendiente, y tambe ta wardando pa haya tur loke ta e cuentanan annual cu falta y yega 2023 y 2024 cu ta e jaarrekening cu mester drenta pa keda cla.
