Awe miembronan di Parlamento ta duna DIARIO razon cu e posicion enfrente gobernacion - *Awe den Parlamento ta condena loke a hiba Aruba na borde di bancarota y medida - *Ley di Contabilidad no ta permiti “Bo Aruba” ni a tiro sigur di proyectonan PPS
ORANJESTAD(AAN)—Duna tempo na tempo. Palabranan di sabiduria di Arubianonan, awe ta bira berdad pa asina DIARIO presenta na Pueblo e oportunidad pa dicta veredicto cu realmente ya Pueblo a dicto for di eleccion 2017.
Ta cu sorpresa DIARIO a scucha con Ley di Contabilidad tabata wordo presenta di ripiente den seno di Parlamento y cuanto reclamo a bini pasobra awor ta trata un Presupuesto di Aruba, cu mester a wordo adapta door di e crisis mundial pero tambe door di exigencianan Hulandes mes pa no papia di e hecho cu Aruba a haya su mes enfrente eleccion ora un miembro mas di Parlamento a wordo declara sospechoso di un caso criminal.
Awe bista di DIARIO ta keda dirigi riba Parlamento, cu mester atende cu e presupuesto di Aruba, cu ta e punto di salida pa gasta placa di Aruba.
Si nos bista ta dirigi riba e forma cu Parlamento ta atende presupuesto, ta pasobra Aruba a casi sink pa motibo cu miembronan di constelacionnan anterior di Parlamento, a deshaci di e trabou sagrado cu Pueblo di Aruba a entrega nan, cu ta cuida placa di Aruba.
Ta cu gran satisfaccion DIARIO a bisti hasta sombre ora el a scucha for di boca di cierto hendenan, declaracionnan haci riba e “ley di contabilidad” cu tanto bez a wordo trece dilanti den nos columnanan ya cu e ley aki ta splica con Gobierno y Parlamento mester atende cu placa di Pueblo.
E forma cu Gobierno ta atende cu placa di Pueblo ta depende di e forma cu Parlamento ta haci su trabou y cu prueba DIARIO a mustra cu ni e proyectonan Bo Aruba, ni e Acuerdo di Citgo, ni e maneho cu Gobierno Mike Eman a hiba, tabata di acuerdo cu stipulacionnan di Ley di Contabilidad, loke a haci cu te awe Aruba ta na careda pasobra e maneho cu Gobierno Mike Eman a hiba tabata parecido na loke Covid-19 a haci.
Aki nos no ta pone e maneho financiero di Mike Eman riba un linea cu Covid-19 ya cu e pandemia tabata algo cu wowo di hende no por a mira yega mundo, pero tanto Gobierno Mike Eman como e miembronan di Parlamento cu a sostene Gobierno Mike Eman, tabata sa cu nan ta destrui Aruba cu e maneho cu nan a hiba y cu tabata contra exigencianan di e Ley di Contabilidad.
E Ley di Contabilidad ta entrega Parlamento e deber di vigila loke Gobierno ta haci. E Miembronan di Parlamento di AVP a entrega e derecho aki ora nan a entrega Mike Eman y Benny Sevinger, e fondo di 1.6 Miljard pa nan bay spart na viaduct y rotonde pa no papia mes di tram.
E Ley di Contabilidad no ta permiti un gasto di Gobierno cu Parlamento no a aproba, pero pa yega na e Acuerdo di Citgo, a gasta placa sin permiso di Parlamento contra e bienestar di Aruba y pa colmo pa un Acuerdo cu a destrui Aruba y cu a wordo firma cu Nicolas Maduro sin cu hasta Miembronan di Parlamento por a tuma nota di loke e Acuerdo ta contene.
Awe kier papia di Ley di Contabilidad. Awe kier tur e reglanan cu Ley a entrega e Miembronan di Parlamento cu den un acto historico a entrega Gobierno Mike Eman, tur elemento cu nan tabata tin pa sigui kico Mike Eman a haci cu 1.6 Miljard di Pueblo.
DIARIO ta contento cu awe ta papia di Ley di Contabilidad. DIARIO ta contenti pa tur e atencion cu tin pa Presupuesto, cu a wordo rementa na 2009 ora a baha BBO cu mita pa saca Aruba for di balansa financiero.
Presupuesto cu a stop di existi ora na 2016 a bisa Pueblo cu economia lo crece cu 15 porciento pa Pueblo na careda bay paga medida cu mester a wordo introduci pa Aruba paga pa debenan cu Gobierno Eman a laga atras.
DIARIO lo sigui informa e Pueblo di Aruba cu a bira victima di bofon politico ora a lanta Pueblo contra Hulanda na 2014 y ora na 2016 a bay tene man di Nicolas Maduro pa asina kere cu por ciega Aruba pa semper!
