Parlamentario Xiomara Maduro ta informa riba e reunionnan reciente di Parlatino

ORANJESTAD (AAN):  Pa Parlamentario Xiomara Maduro e ta un honor semper di por representa Aruba den foronan internacional.

E biaha aki Parlamentario Maduro hunto cu un delegacion di Parlamento di Aruba tabata na Parlatino na Panama, pa representa Aruba den e reunionnan di e Comision di Educacion, Cultura, Ciencia, Tecnologia y Comunicacion na unda nos a trata algun topico interesante manera “neuroderechos,” “scolnan creativo” y enseñansa pa hobennan cu ta hospitalisa. 

            Via e foro di Parlatino hopi informacion relevante ta wordo comparti y contactonan strategico ta wordo estableci cu ta beneficia Aruba. Asina Parlamentario Xiomara Maduro tabata tin e placer pa durante e reunionnan di Parlatino por a cera conoci cu e directora di UNESCO na Chile, sra. Esther Kuisch Laroche kende ta encarga cu e Oficina Regional Multisectorial di UNESCO na Santiago y tambe ta coordinadora di Nacionnan Uni pa Latino America y Caribe. 

            “Nos a combersa riba e Comision y Secretariado di UNESCO na Aruba di cual expertonan manera sr. Peter Scholing ta activo como Presidente di Memory of the World MOWLAC y sr. Marck Oduber ta fungi como Presidente di IOCaribe. Informacion cu ta importante pa comparti ya cu asina por demostra cu Aruba tambe ta activo den busca solucion duradero pa e retonan cu mundo y paisnan chikito manera Aruba ta topa cune,” tabata e palabranan di Parlamentario Xiomara Maduro cu ta describi e balor di e participacion na foro internacional manera Parlatino.