ORANJESTAD (AAN) – Parlamentario Shailliny Tromp-Lee, den conferencia di prensa di fraccion di MEP,
Diaranzon di e siman aki, a expresa cu por fin Minister di Finanzas y Cultura, señora Xiomara Maduro, a entrega e presupuesto 2022 na Presidente di Parlamento, mr. Edgard Vrolijk.
Fraccion di MEP ta contento cu esaki a sosode y nan trabaonan di control ta bay cuminza. El a comenta cu anticipando na esaki, gobierno den diferente ocasion a comparti cifranan di e presupuesto aki.
Mas cu awo Parlamento a haya e documento completo y ta keda na nan pa bay analiza y evalua, ki stapnan nan ta bay tuma pa loke ta trata e aspecto di control, cu nos como parlamentario mester realiza.
“Mi tin cu bisa cu e presupuesto ta refleha ainda, fuertemente, e impacto di e situacion di pandemia cu nos ta saliendo for di dje, unda nos por mira un necesidad financiero di 1.305 miyon florin, y un deficit financiero di 291 miyon florin.
Pero na mes momento, mi tin cu enfatiza cu e presupuesto ta duna un bista alentador tambe, pasobra na mes momento, manera gobierno a bin ta indicando, nos ta mira cu e trayectoria di recuperacion cu tanto nos ta anhela, ta keda refleha tambe den e cifranan aki, y manera cu gobierno a informa, nos por mira un mehoracion den nos economia, cu ta keda traduci den cifranan di entrada alentador, pero riba e punto aki mi ta bay duna hopi atencion, mirando cu tin un disputa entre con CAft kier mira cifra y pronosticonan, y e manera con Gobierno ta uza esakinan”, Parlamentario Tromp-Lee a señala.
Tromp-Lee a subraya cu contrario na opinion di CAft, pa loke ta trata entrada di Pais Aruba y e tema di recuperacion, e mes kier tuma un postura mas cauteloso, y kier trata e cifranan y pronostico como tal, pasobra e ta haya cu e regla stipula pa na 2022 ya caba Aruba mester a haya un presupuesto balansa, na su opinion personal ta uno irealistico, y ta hinca Aruba den un situacion mas preta y delicado.
No obstante, el a bisa cu ta contento cu Hulanda a tuma e decision cu gobierno por hala un banda e stipulacion menciona y asina duna gobierno mas espacio pa na 2022 por maneha y saca e pais for di e situacion penoso cu e ta aworaki. Tromp-Lee ta mira esaki como un muestra di confianza cu nan kier duna enberdad, espacio na gobierno pa traduci tur loke nan a bin premirando nan maneho y intencionnan, y maneha e pais aki cu tur trankilidad y cu menos presion.
Pa loke ta e presupuesto riba su mes, Tromp-Lee a bisa cu awo ta bay encamina e proceso internamente y nan ta bay trate den corto tempo, unda ta bay stipula cuanto tempo lo duna Parlamento pa haci su trabao di analiza, haci pregunta, y manda nan den direccion di gobierno, y cu lo tin espacio pa contesta esakinan, y manda nan pa Parlamento bek.
