ORANJESTAD (AAN): Parlamentario Endy Croes a splica encuanto algun decision di ex directornan di WEB cu a pone Aruba den un posicion peligroso cu Hulanda.
Parlamentario Endy Croes kier ta hopi cla cu den su curason e lo ta hopi contento si tur empleado, tanto publico y di companianan estatal por haya nan 12.6% bek pero lamentablemente, ainda esaki no ta posible. E dia lo yega sigur!
Kico ta un di e decisionnan cu ex directornan di WEB a tuma ?
Parlamentario Croes a bisa cu nan a sigui e desaroyo di WEB di cerca y por a constata cu ex directornan en realidad a faya barbaramente den diferente decisionnan crucial. Un di nan ta e decision cu nan a tuma pa duna empleadonan 2 dia extra di vakantie. Esaki ta traduci den alrededor 6%. Pues di e palabracion cu Hulanda pa Aruba yega na remarke pa keda ricibi entre otro Loonsubsidie, Aruba mester cumpli pa corta salarionan di ambtenaar y empleadonan di companianan estatal cu 12.6% tot “nadere orde”.
Cu e decision aki WEB ta desviando di palabracion di gobierno di Aruba cu gobierno di Hulanda. "Nos no por permiti na e momentonan aki pa drenta den polemica innecesario cu Hulanda door di keda sin cumpli cu palabracionnan. No pa motibo cu nos NO kier para duro contra Hulanda pero hecho ta cu tin palabracion entre e gobiernonan. Mester remarca cu e placa di Hulanda ta cubri desde 2020 alrededor di 21 mil empleado cu tabata riba Loonsubsidie. Berdad cos ta drechando y esaki a baha bastante recientemente pero nos no ta ainda unda nos mester ta". Pio awor cu Covid ta aumentando atrobe y ta aumenta preocupacion.
Gobierno a establece un cuadro pa WEB:
Manera Promer Minister a acentua cu como Minister e No ta mete den WEB pero si a establece un cuadro ( marco) dentro di cual gobierno kier mira WEB traha y cumpli asina cu e vision di gobierno. WEB tin tur libertad pa asina traha y sondea tur manera pa logra e vision aki. Uno tabata pa percura pa reduci prijs di awa y coriente pa pueblo y dos tabata pa busca alternativa pa traha cu energia mas limpi y no keda depende solamente riba HFO. Tur esaki teniendo na cuenta tratadonan internacional manera tratado di Paris 2050 pa baha emision di CO2 den aire pa contribui como pais pa combati global warming y climate change. Reduccion di prijs di awa y coriente a drenta na vigor desde Januari 2020 pero lamentablemente e parti pa traha cu energia mas limpi WEB no a logra. Desde 2010 WEB ta studiando materia manera LNG gas unda WEB a gasta miyones na companianan internacional pa tur sorto di conseho sin un decision final y un rumbo fiho.
Blackout di 3 di Juli 2021 a pone directornan den mas mal spot:
Di 3 di Juli 2021 Aruba a conoce un Blackout total net na momento cu turismo a cuminsa florece. Comercio y economia a sufri un perdida enorme. Gobierno unico shareholder di e compania estatal WEB a haci 3 pregunta na directornan di WEB. Kico a pasa? Kico nos a haci pa evita cu el a pasa? Kico nos ta haciendo pa evita cu e lo bolbe pasa? Den e prome pregunta kico a pasa te cu awe gobierno no a haya un contesta oficial. Pa cu e di dos pregunta a ricibi un contesta cu WEB no a haci nada pa evita cu el a pasa. Contesta pa e di tres pregunta, kico WEB ta haciendo pa evita cu esaki ripiti, por a compronde cu WEB no a haci nada tampoco. Directornan no por ta gana tanto placa anto no ta carga responsabilidad.
Hedging ta caba na December 2021 :
WEB a hedge na 2020 na un prijs hopi abou esta na $38 dollar pa bari. Contrario na Mike De Meza cu a causa desaster den WEB causando 300 miyon di perdida e tempo aya. E hedging aki di $38 dollar pa bari ta termina december 2021 consecuentemente a resulta cu directornan no a haci nada te ainda y awe ya caba prijs di petroleo ta na $74 us dollar pa bari. Aki tambe ta constata mas fayo den decisionnan crucial di directornan. Tur esaki causa cu a manda yama e directornan aden pa un reunion pero directornan mes a prefera di usa clausulanan den nan contrato pa entrega nan retiro prome cu e fecha di dicho reunion. WEB ta para dilanti retonan grandi pa tuma decisionnan grandi y corecto na beneficio di WEB pero tambe pa henter comunidad.
