Fin di Augustus... - PHILIPSBURG: Informacion for di isla di St. Maarten, ta indica cu pa mitiga e brote di Covid-19 na tur Clubnan Nocturno riba e isla,
awor negoshinan aki lo bay controla tur hende na porta pa mira kende a vacuna, y kendenan no.
Den fin di siman, Ministro di Salubridad Publico Omar Ottley a firma un Memorandum of Intent cu e negoshinan di club nocturno, discoteca, y lounge, pa implementa e medida aki dentro di dos siman.
Door di firma e Memorandum of Intent aki, tur instancia a “reconoce y subraya e necesidad pa bin cu medidanan pa regula e operacion di negoshi na un forma safe y responsable pa asina mantene salud publico y seguridad.”
E negoshinan a bay di acuerdo pa reduci nan operacion di Club Nocturno pa dos siman, durante cual nan ta bay traha riba areglonan pa crea e.o. un sistema di maneho di salud via un App of tambe via QR Codes.
E corant The Daily Herald na St. Maarten, a bisa cu e siguiente dos simannan e establecimentonan di bida nocturno lo no organiza eventonan grandi, ni laga hopi hende drenta. Casinonan, clubnan, y barnan na beach lo tin di percura pa tur cliente ta mantene distanciamento fisico.
Pero despues di 2 siman, nan lo cuminza cu e proceso pa admiti solamente esnan cu tin prueba cu nan a vacuna, of cu tin test negativo recien di Covid-19. Autoridadnan lo bay eherce control estricto riba tur esaki.
Ministro Ottley a bisa cu e no kier mira Nightclubnan pata-pata durante e pandemia. E cantidad creciente di casonan di Covid-19 ta bin danki na variantenan hopi contagioso, manera esun Delta, y esey ta e motibo cu Ministro di Salubridad Publico a tuma e medida estricto aki.
E medidanan urgente a wordo tuma den consulta cu Ministro di Turismo Ludmila de Weever.
Tur dos Ministro a mustra cu e situacion actual ta mustra di ta un menaza serio pa salud publico y seguridad publico. “Tin un necesidad urgente pa medidanan preventivo continuo pa asina proteha empleado y clientenan. E Ministronan ta insisti tambe pa bin cu solucionnan tecnologico pa maneha informacion di salud di empleado- y clientenan.
Pa fin di Augustus, bida nocturno na St. Maarten lo no ta accesible mas pa hendenan cu no tin prueba cu nan no tin Coronavirus. Un prueba electronico di vacuna, of un test negativo di Covid lo wordo rekeri na porta di un Club of Casino pa bo drenta.
Hendenan cu no a haci test te cu 72 ora adelanta, lo por haci un Rapid Antigen Test na algun di e Clubnan Nocturno. Aki algun siman lo anuncia ta cua establecimento lo haci e Rapid Antigen Test aki, y kico e costo lo ta.
Segun e Memorandum of Intent, na fin di Augustus e clubnan nocturno y casino lo por yena e lugar te cu 100 porciento solamente si e bishitantenan ta vacuna. Of tambe si 75% di clientenan ta vacuna, y 25% di e clientenan tin un PCR Test negativo ora cu nan drenta e negoshi.
