ORANJESTAD (AAN): Parlamentario Endy Croes a asisti reunionnan interesante di IPKO recientemente na Bonaire.
Ta trata di reunionnan entre Parlamentarionan di Hulanda, Aruba, Corsow y St Maarten. Hulanda a organisa e IPKO aki a escoge pa haci esaki na Bonaire como cu na Den Haag salanan ta den renobacion.
Durante e IPKO aki Parlamentario Endy Croes a probecha pa traha mas riba un mihor networking den contactonan personal cu diferente Parlamentarionan.
Manera ta conoci, Corsow a pasa den un proceso di eleccion 19 di maart ultimo y Corsow tin su Gobierno nobo y su Parlamento nobo y na timon di Parlamento di Corsow nos tin señora Charetti America Francisca. Parlamentario Croes por a hiba un combersacion cu Presidente di Parlamento di Corsow y asina a sera conoci cu señora Francisca.
Un otro reunion interesante tabata cu Jorien Wuitte di D66 di Hulanda. Hulanda tambe a pasa den un proceso electoral 17 di maart ultimo y tin miembronan di Tweede Kamer nobo pero ainda no a logra forma nan gobierno mes. Jorien sinembargo a nace na St Maarten y a yega di fungi como gevolmachtigde minister di St Maarten.
Jorien ta enfoca entre otro den industria creativo, salubridad, innovacion, trabaonan di desaroyo internacional y traha den conhunto riba desaroyonan pero tin su master tambe den Public Management. Durante dicho reunion Parlamentario Croes a logra pasa riba puntonan di interes pa Aruba. Por sinti cu Jorien su sentimento pa e ilsanan den Caribe ta resalta y su amor pa brinda ayudo na islanan ta imenso. Mas cu klaro nos a keda di hasi un follow up zoommeeting den september pa asina acelera temanan di hopi interes pa Aruba.
Finalmente Parlamentario Endy Croes ta kere cu banda di asisti na reunionnan oficial di IPKO semper mester probecha e momento pa networking pa cu Parlamentarionan den Reino y complementa asina e reunionnan di IPKO cu un mihor resultado Croes a termina bisando. Tin hopi reto pero awor tin mas network y boluntad pa yega na ayudo y solucion.
