Parke di Ayo Rock Formation lo bira un hardin botanico

ORANJESTAD (AAN) – Minister Presidente, Evelyn Wever-Croes a sigui elabora, den conferencia di prensa convoca na Sero Ayo, riba e di tres fase di e proyecto aki di renovacion.

            E dignatario a expresa cu esaki ta un parti hopi interesante unda lo converti parti di e parke den un hardin botanico, cu mata y especienan original cu ta crece na Aruba.

            “Ayo Rock Formation, no ta solamente un area historico pero tambe botanico. Y asina nos por duna realze tambe na dibuhonan petroglyph cu tin den e cuebanan di Ayo.

            Di e forma aki Ayo Rock Formation lo bira un atraccion local pa nos y pa nos bishitantenan. Y pensa cuanto nos muchanan di scol por siña door di pasa dia akinan, tambe” Prome Minister a bisa.

            Minister Wever-Croes a reitera cu e di dos meta di e proyecto ta pa expande y establece e industria artistico na Aruba, pasobra cu ta bin awendia, nan kier cumpra algo netamente di Aruba, y akinan nos mes artistanan y artesano lo haya oportunidad pa expone nan producto. Nos no ta pensa solamente riba souvenir, pero localnan por bin akinan y haya tambe producto local. Nos ta mira hopi bunita arte di mosaico, pintura, joya, accesorio, pero tambe habon, crema, bela, y un cantidad di cos cu ta wordo traha na Aruba mes.

            Nos tin hopi potencial artistico na Aruba, y cu e proyecto aki nos ta spera di por duna cada artista y artesano local e oportunidad di por trece nan producto padilanti”, Prome Minister a bisa, y a felicita e Comision encarga cu e proyecto.