Sosten di DIARIO pa e proyecto basa riba e alarma cu el a bati
- Sosten completo pa estudio cu mester revela necesidad di cas
- Felicidad di hende ta cuminsa den su ambiente diario directo
ORANJESTAD (AAN)- Vivienda ta ocupa un lugar sumamente importante den bida di hende.
Na 2020 ora e pandemia a haci necesario pa hende isola su mes y keda cas, e importancia di un vivienda cu ta honra necesidad humano, a bini dilanti.
Un hende cu ta sinti su mes feliz na su cas, por desaroya y produci mihor pa su mes, su ambiente mas cercano pero tambe pa henter su pais.
“Woongenot” ta un palabra sumamente importante ora atende cu vivienda, pasobra e ta mustra riba e forma cu un hende por gosa di e ambiente den cual e ta habri su wowo mainta, cera su wowo anochi y ta pasa e momentonan mas importante di su bida.
Despues cu DIARIO a ilustra e problema serio cu ta wordo ocasiona cu vivienda na Aruba, caminda edificionan cu mester sirbi como cas di famia ta wordo tranforma den acomodacion turistico den un situacion cu ta haci cu prijs di vivienda a subi, na forma importante, Ministro Geoffrey Wever a reacciona y awor a anuncia e estudio oficial cu lo wordo haci riba e tema tan importante aki.
Crecemento di poblacion sin duda a afecta e necesidad di mas cas pero tambe e hecho cu na Aruba tambe mas y mas persona kier ta independiente y gosa di nan propio vivienda y lugar pa biba.
Cas propio tabata parti di e cultura Arubano, cu a mira con un enlace matrimonial tabata wordo prepara cu e construccion di un cas como centro di e famia nobo.
Huur acomodacion a bira costumber pero tambe a bira problema serio na momento, cu manera DIARIO a trece dilanti, el a bira negoshi cu ta competi cu lugarnan cu ta exigi prijs halto pa acomoda turista.
E accion di Gobierno pa encarga estudio di e problema serio ta confirma e varacidad di informacionnan di DIARIO, directamente conecta cu e Pueblo Arubano cu ta expresa su necesidadnan mas importante na e matutino di Aruba.
En espera di ehecucion di e accionnan pa encamina e proceso pa elimina e problema serio di costo di vivienda, lo ta bon pa cuminsa tuma algun paso sumamente necesario pa alivia e situacionnan di desesperacion cu ta existi cerca personanan cu sigur den e tempo di costo halto di bida, ta confronta problema serio den nan buskeda di un vivienda.
Na mes momento lo ta bon pa sigui vigila e peliger di viviendanan cu no ta apto pa turismo pero ta acomoda turista, pa asina tambe evita cu proyectonan serio di apartamento pa turista, cu ta aporta na economia, por bira victima di negoshi clandestino hasta peligroso.
DIARIO lo sigui trayecto di e plannan di Gobierno y desaroyonan riba tereno di vivienda, cu ta cuna di e bienestar nacional di Aruba awe y den futuro.
E cas di un persona ta decisivo pa su felicidad diario!
