Minister Wendrick Cicilia:
ORANJESTAD (AAN) – Cu el a forma parti di e Comision di Formacion di Gobierno AVP-Futuro, como un hoben, rondona di hopi persona cu experiencia, pa Wendrick Cicilia tabata un experiencia hopi placentero.
“Mi a forma parti di e Comision cu a redacta e programa di gobernacion, pero esaki no ta desconecta di locual nos a bin ta comunica. Mi ta kere cu den e proceso di campaña nos tabata tin cierto puntonan di bista, cierto perspectivanan politico, cierto cambionan cu nos a vocifera, cu nos ta desea di mira pa wordo cambia den nos pais, y esakinan a wordo inculca, introduci y ancra den e programa di gobierno, y mi ta kere cu aworaki, ta momento di implementacion”, Wendrick Cicilia a señala.
El a subraya cu loke ta bay den liña cora den e gobernacion di AVP-Futuro, pa aña 2025 y aki cuater aña, ta bay ta aña di implementacion. “Unda cu palabra mester ta conecta na accion, manera cu ta beneficia bida di hende. Y mi ta kere cu esaki ta momento unda cu nos tin cu bay implementa locual cu ta nos intencionnan y nos deseonan pa Pais Aruba, pasobra comunidad ta wardando accionnan, decisionnan politico concreto, cu ta bay mehora nan experiencia di bida. Mi ta kere cu esaki mester ta nos punto di enfoke: Implementacion”, Wendrick Cicilia a reitera.
El a indica cu e kier hiba un politica di porta habri, y cu no tin duda den dje. “Mi ta kere cu e portanan ta habri pa hiba dialogo, pa sinta na mesa, y esey ta e politica nobo; e gobernacion cu comunidad di Aruba ta spera: gobernantenan accesible, personanan cu no solamente ta bay sinta y cera nan mes den e oficinanan na Cocolishi, pero cu tambe ta conecta cu nan hendenan aki’fo, cu ta cana den pueblo, cu ta sinti nan dolor, cu ta biba realmente, meymey di nan pueblo. Pasobra esaki ta unico manera cu bo por sinti nan dolor, nan preocupacionnan, y percura cu bo maneho y bo decisionnan realmente soluciona problema di hende. Mi a kere cu ‘open door policy’, un gobernante accesible, esey ta locual cu pueblo di Aruba tin den e Gabinete aki, pero sigur den mi persona!” Wendrick Cicilia a remarca.
