Analisis di Aruba durante Great Recession y den su tripel crisis actual - *Na 2007 mundo a despedi di SARS-CoV1 y a cay den Great Recession - *Na 2021 Aruba ta lucha cu SARS-CoV2 den crisis mundial di petroleo
ORANJESTAD(AAN)—E entrada pa Siglo 21, no tabata facil pa Aruba, cu na 2000 tabata un pais relativamente hoben., cu un economia cu a wordo produci pa un shock economico na momento di su cambio estatal pa Status Aparte.
DIARIO tabata e vocero periodistico di Status Aparte, realisa dor di un Aruba cu ya a crea un base pa diversificacion economico cu turismo ora na Den Haag, Hulanda na 1983, Betico Croes a logra e autonomia estatal di Aruba.
1983 tabata un aña di victoria estatal, pero tambe a conoce sucesonan doloroso riba tereno politico y e shock provoca pa Exxon, cu no por a yega na un areglo pa un prijs special di petroleo cu Exxon.
Aruba mester a despedi di Lago y a keda pendiente di turismo y e infrastructura adapta na un turismo creciente, cu a wordo atende dor di e ultimo Bestuurscollege encarga cu asuntonan domestico durante e ultimo etapa di Teritorio Insular di Aruba.
Na 1986, Status Aparte a duna Aruba e oportunidad pa como pais autonomo, duna garantia pa proyectonan di turismo, loke Aruba lo no por a haci sigur como parti di Antia Hulandes.
Di 1986 pa 2000, Aruba tabata parti di un mundo cu a wordo manca pa e crisisnan petrolero di di decada 80, cu a cera refinerianan pero tambe a mishi cu e poder di placa di petroleo na Latino America.
Aruba a drenta Siglo 21 como pais “teenager” pa wordo confronta na 2007 cu e “great recession” mundial.
E recesion mundial a presenta su mes despues di e atake di e Prome Coronavirus, SARS CoV 1, cu entre 2002 y 2004 tambe a pone hende tapa boca, stop di biaha y wordo confronta cu fronteranan cera y tur resultado.
E recesion mundial di 2007, sinembargo, tabata basa riba e desaroyonan di vivienda na Merca, caminda e “boom” di vivienda sin bon financiamento, a rementa y a causa e recesion mundial.
Na 2007 Aruba tambe mester a tuma medida y e tempo mas y mas mundo tabata boga pa reforma fiscal, loke tabata nifica cu tabata bandona belasting directo pa introduci belasting indirecto.
E diferente belastingnan na Aruba a wordo ahusta y a introduci BBO, cu tabata mas cu un “sales tax” sin e multiplicacion di BBO.
Aruba na 2007, sinembargo, tabata conciente cu mester a tuma medida financiero na e pais cu Reino a exigi tuma medidanan pa evita cu e garantianan lo a rementa den man di Aruba.
Pakico na 2007 Aruba no a recupera di e impacto di e Great Recession?
Na 2009 Aruba a deshaci di mitar di entrada di Aruba dor di kita mitar BBO como promesa politico, creando un peso nobo pa debe nacional, na momento cu Valero a cera portanan di e refineria.
Na mes momento Aruba a lansa e proyectonan di “Bo Aruba” den cual Gobierno a uni empresa priva y a inverti placa di Aruba, cu hunto cu e debe directo di e proyectonan mester a tene cuenta cu gastonan adicional y interes riba 1.6 Biyon.
Den e tempo aki, e caida di turismo di Venezuela (cu tempo di Petro Dollar tabata entrada importante pa turismo na Aruba), a afecta turismo.
Si Aruba no tabata tin Hulanda pa interveni pero tambe pa duna asistencia financiero, Aruba lo a bira uno di e hopi paisnan cu un explosion economico, financiero y social.
Awe Aruba mester bandona e tripel crisis forma pa e crisis financiero hereda manera describi, e Pandemia Covid-19 y e crisis petrolero cu tin mundo den su gara.
Pa Aruba sobrebibi no por ripiti eror di garantia di Aruba pa proyecto, di medidanan popular manera mitar BBO, mas proyecto PPS pa paga despues.
Aruba mester tene na cambionan infrastructural y tradicion politico cu ta uza placa di Pueblo pa politiconan haya voto.
Aruba por sobrevivi, si Eagle LNG y Quanten drenta y cu e dos industrianan aki e base pa sosten di mas empresa cu lo mira luz.
Aruba por sobrevivi, si e infrastructura politico cambia y tene na e formula alcansa den e Acuerdo cu Hulanda, pa baha gasto y subi entrada.
Aruba por sobrevivi, si tur gremio asumi nan responsabilidad pa a base di berdad, guia Aruba ma un futuro realistico.
October 2021, conoci como entrada pa High Season di turismo y economia, ta prueba cu e situacion na Aruba ainda no ta normal. E lo no ta por lo pronto.
Aruba mester recupera a base di responsabilidad y no aventura politico, pa porfin Status Aparte bira realidad na un pais realmente autonomo y feliz.
