7 Juni 1934-15 October 2016: - Dia 15 di October 2016, Jossy Mehsen Mansur, a cera su carera di pionero den periodismo local ora e mes a bira noticia local y internacional.
Awe ta cinco aña pasa, cu medionan di comunicacion a presenta e informacion di ultimo hora, cu Jossy Mehsen Mansur a fayece.
15 di October 2016 tabata e dia cu Jossy Mansur a entrega su pais natal, e herencia di e relato diario di e culminacion di e lucha sagrado di Aruba, cu tabata e esfuerzonan nacional pa Status Aparte.
E vision di Jossy Mansur a haci posibel, pa awe hubentud di Aruba por lesa kico tabata pasa diariamente na nan pais, na e momentonan cu Betico Croes a logra e autonomia di Aruba como pais den Reino.
DIARIO no ta e unico obra di Jossy Mansur, cu a entrega su talentonan y su mes na su pais. Sinembargo, DIARIO a bira e herencia grandi como e instrumento pa Pueblo di Aruba por a informa su mes, comunica cu otro y diariamente construi e base di Aruba como pais autonomo y te awe sigui habri caminda pa Aruba cu e vehiculo nacional di e idioma Papiamento.
E vision di Jossy Mansur no a wordo limita pa realidadnan financiero. Porta a wordo cera pa poder financiero importa di otro pais, cu e decision grandi cu DIARIO ta propiedad Arubano, pa publico Arubano, skirbi na Papiamento di Aruba, cu benta y aviso comercial di Aruba.
Jossy Mansur a cera porta pa benta organisa di DIARIO den exterior, hasta na otro islanan Hulandes den Caribe, pa asina evita cu e poder financiero exterior, por tin resultado pa e contenido di DIARIO, cu segun Jossy Mansur mester a sirbi Pueblo di Aruba sin limite.
DIARIO a bira un producto unico di Pueblo di Aruba y te awe ta completamente dependiente di mercado di Aruba, desaroyonan na Aruba y bienestar di Aruba.
E esfuerzonan di Jossy Mansur pa entrega Aruba un medio di comunicacion pero tambe duna inicio na e relato diario di construccion y realisacion di e pais autonomo Aruba, a conta cu sosten di su señora esposa Nuhad Mansur kende na momento cu cinco aña pasa Jossy Mansur a despedi, a bira e vehiculo pa entrega DIARIO na futuro pa asina por sigui skirbi e historia diario di Aruba.
For di e prome edicion di DIARIO, e Arubiano semper por bolbe na cada paso di Aruba for di entrada di decada 80, ora uni den Himno y Bandera, Aruba a yega na e Conferencia di Mesa Redonda na 1983, caminda Betico Croes a logra e Status Aparte, e autonomia estatal di Aruba.
Cu un empeño total, Jossy Mansur a dirigi DIARIO, te na e momento cu dia 5 di October 2016 e mester a entrega su spada debi na e realidad cu tur hende ta comparti, cu ta despedida di e existencia terenal.
Awe cu Aruba mester di inspiracion continuo den un mundo cu mester worde completamente renoba, Jossy Mansur ta keda e inspiracion grandi pa diariamente entrega Aruba, e historia diario di nos dushi tera.
