Pader Jairo Maduro contento cu Aruba tey den e Hubileo di Hoben 2025 na Roma

ORANJESTAD (AAN) Pader Jairo Maduro, di Parokia Immaculada Concepcion na Santa Cruz, tabata presente na Aeropuerto Reina Beatrix,

pa dispidi di e Delegacion di hoben y adulto, cu a biaha pa Roma, pa participa den e Hubileo di Hoben 2025, y claro pa desea nan tur cos bon, y duna nan su bendicion den nomber di Dios.

   Pader Maduro a bisa cu e ta contento cu nos hobennan a bay biba un bunita experiencia di spiritualidad, di musica, dinamica, enseñanza, y tambe nan ta bay conoce e Ciudad di Vaticano.

   “Tin un programa special pa nan den tur e dianan cu nan ta keda. Nos ta spera cu ora nan bin bek nan ta bin cu hopi entusiasmo, pa sigui cu e actividadnan cu nan tin caba, cada un den nan parokia”, Pader Jairo Maduro a menciona. E ta haya ta bon pa nos hobennan participa y conoce otro hobennan tambe y comparti ideanan.

   El a agrega cu door cu esaki ta Aña di Hubileo, esaki ta wordo celebra no solamente pa hoben, pero tambe pa adultonan, gobernantenan, y otro gruponan. Luna pasa tabata pa Iglesia y Sacerdotenan y e mes tabata na Roma pa participa.

   “Mi ta desea nan hopi exito y pa nan probecha di tur cos cu por ricibi aya banda, y ta nan tempo di vacancy tambe, pa nan goza. Hopi di nan ta bay pa prome biaha na Vaticano, anto pa nan keiro, puntra, siña. Kiermen, mi ta desea nan tur cos bon”, Pader Jairo Maduro a expresa.