Caso Kwihi ta crea speransa importante pa futuro politico
*Chris Romero bou investigacion cu su partido na mando
*Decision di Huez den campaña ta resona den actualidad
ORANJESTAD (AAN) — E pio enemigo di progreso di un pais, ta corupcion. E ta un forma di pensa, cu directamente ta afecta e base di democracia, cu mester garantisa bienestar di tur hende y no ta dirigi su mes riba uzo di e recursonan nacional pa sirbi interes di un grupito.
Prome cu nos sigui, nos kier aclarea cu ora papia di un “grupito” no necesariamente ta papia di un grupo financieramente poderoso.
Corupcion ta hustamente e arma cu ta destrui e nificacion y contenido cu “poder” mester tin, pasobra corupcion ta mara e pensamento di liderazgo cu un comunidad mester, na accionnan baho y criminal na bienestar di hende di tur nivel social, cu kier horta bienestar di otro.
Ora mira atras riba e historia di Aruba como pais autonomo den Reino, por tuma nota di e cantidad di casonan criminal cu a termina dilanti mesa berde, caminda Husticia mester a atende cu politiconan.
Corupcion ta mata democracia pasobra e ta kibra ley cu ta proteccion di loke ta bon den un comunidad.
Corupcion ta destrui un comunidad, pasobra criminalidad ta wordo corona y ta destrui e poder autentico di Pueblo, cu democracia y asina mundo politico mester tin como centro di su lucha.
Durante e ultimo eleccionnan na Aruba, por a mira firmesa cerca representantenan di Husticia, cu hasta a parce di ta anuncia un periodo den cual porfin e impresion ta wordo crea, cu Aruba ta lanta para contra corupcion.
Huez a rechasa peticionnan pa por ehempel entrega lista di votadornan na partidonan politico manera solicita dor di AVP y a papia di presion cu esaki lo ta pa votadornan, cu politiconan ta busca na nan cas contra nan boluntad posiblemente, pa bay vota.
Huez a condena e hecho cu copia di un formulario di voto, a bira publico.
Huez a splica con corupcion ta nace den eleccion.
Na Aruba ora ta atende cu e temporada den cual lama ta depone cantidad di sushedad na costa, ta papia di e epoca den cual “lama ta laba su mes”.
Ora mira bon, ta lama so por laba su mes pasobra ta sumamente dificil pa hende colecciona tur loke depone den fondo di lama.
Pa politica conoce cambio y deshaci di corupcion, politica mester laba su mes.
Despues di un serie di caso den cual politico ta envolvi, porfin por mira con politiconan cu tabata parti di partidonan na mando, tambe ta wordo investiga y persigui.
Recientemente Prome Ministro Evelyn Wever-Croes a entrega keho contra Besaril di Arubahuis. Investigacion a haya inicio.
Actualmente e caso Kwihi den cual nomber di dos exponente grandi di MEP ta wordo menciona y hasta un ex Ministro di e partido ta central, ta duna e indicacion cu lama ta laba su mes.
Cu e partido na mando y a base di e decision di e propio Gobierno pa un investigacion, Husticia ta drenta den accion.
Den un tempo di crisis mundial, cu ta anuncia un epoca mundial nobo, Caso Kwihi ta duna speransa cu integridad politico cu ta keda presenta den persecucion legal, lo debolbe confiansa na votadornan.
Lama ta laba su mes?
E accion firme di Husticia durante eleccion, a crea confiansa den nos sistema di Husticia como ala di Trias Politica.
E actuacion di Prome Ministro Evelyn Wever-Croes den e caso Besaril, ta duna confiansa den gobernacion, cu ta refleho di e mayoria den Parlamento.
Politica na Aruba ta laba su mes? Nos ta drenta un epoca nobo den cual hobennan talentoso kier sirbi nan pais cu honrade? Nos a drenta e futuro nobo den cual democracia ta vence?
E loke a pasa den Caso Kwihi, ta bisa “si”. Pasobra Pueblo no mester a spera te ora Gobierno baha of Oposicion dicidi, pa exponentenan politico di Gobierno na mando, wordo investiga segun e principionan di Husticia, cu ta exigi cu Ley pa uno ta Ley pa tur!
