Caricom ta reuni Diaranzon pa atende refugiadonan di Haiti
*Hopi pais den e region no tabata tin asistencia financiero
*Horizonte mundial ta keda scur y region den problema serio
ORANJESTAD (AAN) — Aruba ta un paraiso. Un realidad cu a wordo afecta un rato pa e Pandemia Covid-19 sigui pa e Guera na Ukraine, cu ainda sigur no a termina.
Cu Aruba mester hala rosea y disfruta un rato di Carnaval, sigur ta un hecho. Un bendicion pasobra Aruba ta den e posicion cu e por permiti su mes un rato di alegria prome cu e sigui dilanti.
Sinembargo, Aruba mas cu nunca mester tene na consideracion cu e ta un isla rondona pa lama, cu ta trece ola pero tambe problema cu ta origina na paisnan cu no tin e suerte cu Aruba tin.
Na momento cu porta di Aruba a cera, e pais como parti di Reino, por a pidi y haya asistencia pa enfrente e Pandemia Covid-19 cu bacuna y cu prestamo.
Aruba como pais desaroya y un nivel halto di educacion y di bida, no mester a acepta e suerte di cantidad di pais den su region, cu no tabata tin e asistencia cu Aruba a conoce y cu a haci posibel pa Aruba por a sigui cana, mientras inflacion a bati na porta, a subi tur prijs y a haci bida casi impagabel.
Awe ta bay disfruta di Carnaval y Aruba mester di e alegria. Na mes momento Aruba mester keda den estado di alerta y mester vigila su bienestar.
E situacion regional di Aruba ta sumamente serio.
Diaranzon e organisacion Caricom di paisnan Caribense, ta bini hunto pa trata e problemanan serio na Haiti, cu ta wordo azota pa desastre social y violencia.
E cantidad di refugiado di Haiti ta sigui aumenta y ta yega den condicionnan inhumano na paisnan den e region Caribense, cu tambe a wordo afecta pa e pandemia y pa e efectonan di Guera di Ukraine.
Na paisnan manera Venezuela, e situacion ta caotico. E sexo femenino mester cuida su curpa pasobra ladronicia di hende muher, a bira un peliger grandi.
Muhernan ta wordo captura pa wordo uza den exterior como prostituta na man di bandanan criminal.
Trafico di droga y arma ta sigui mientras refugiadonan ta sigui busca salida pa nan situacion.
Paisnan grandi no a drenta 2023 cu e inflacion cu a wordo spera. Pero problema sigur no ta tras di lomba manera ayera atrobe a wordo adverti, mientras e confrontacion na Ukraine manera DIARIO a spierta, a bolbe recobra forsa.
Organisacionnan internacional ta adverti cu por spera cu e prijsnan mundial, cu awor a parce di ta stabilisa, por bolbe conoce aumento y cu inflacion ainda no por wordo considera un asunto cu a termina.
Carnaval ta bati na porta. Hende mester lubida problema un rato.
Pero ta e deber di periodismo pa adverti pa ta cauteloso como un pais, cu ta un paraiso den un drama social Caribense y Latino Americano.
Vigilancia y cautela ta necesario no solamente di parti di autoridad, cu ta sigui tuma tur paso cu seguridad nacional ta exigi.
E sonido di musica ta yena aire di Aruba, cu a conoce lockdown. A conoce restriccion y e peso di bida, cu Aruba por a enfrenta cu asistencia di Reino cu hopi pais no tabata tin.
Despues di Carnaval mester sigui atende cu un mundo insigur, cu sonido di guera y dolor humano y un produccion mundial cu atrobe por conoce crisis den inflacion, recesion, cu ainda no a pasa pa historia!
