ORANJESTAD (AAN) -- Director di SVb, Edwin Jacobs a duna un relato den conferencia di prensa di Gobierno di Diaranzon, tocante e Programa di Subsidio di Salario,
cuminzando pa splica cual ta e proceso cu mester sigui ora cu un empresa ta ricibi subsidio di mas, of di menos, manera por a lesa den un prome articulo.
Director di SVb a tira un bista riba e promedio di loke empresanan cu a ricibi subsidio di mas tin cu devolve, 60% di nan tin un promedio di 1.030,= florin pa paga bek pa cada luna.
“Un suma cu si bo no ta di acuerdo cune por bay den obhecion y si bo ta di acuerdo cune por haci un acuerdo di pago cu SVb”, Jacobs a reitera.
Jacobs a menciona cu 21% di e empresanan tin un cobranza pa paga bek (entre 2500 y 5000) cu un promedio di 3.896 florin y por lo tanto, nan tambe por haci un areglo di pago cu SVb. 80% di e empresanan a ricibi un cobranza cu ta abao di 5.000 florin pa paga den e tres lunanan aki.
“Manera Minister a indica, e necesidad di loonsubsidie ta bay keda, tanten cu nos ta den recuperacion. Un calculo global di SVb ta mustra cu pa e proximo cuartal nos lo bay tin mester di un 35 miyon florin ainda. Nos ta mira cu e suma di subsidio a bin ta bahando, tambe pa motibo cu e economia a keda habri mas y cu mas. Nos ta den recuperacion y e porcentahe di perdida di benta ta bahando, por lo tanto e necesidad na subsidio tambe ta bahando.
Nos a paga pa luna di Mei te aworaki, den e prome rond 15 miyon florin; na luna di April e tabata 19 miyon; na Maart tabata 21 pa 22 miyon florin. Nos ta bay ta mirando cu e ta bay ta bahando manera cu nos economia y nos turismo ta pick up”, Jacobs a subraya.
