ORANJESTAD(AAN)— Na 2017 Mike a bisa cu e ta entrega spada pasobra Aruba no a duna su persona y su partido e cantidad di asiento cu el a desea.
Awe Arubianonan ta puntra nan mes si e forma cu Mike Eman a regresa riba plataforma politico di Aruba, no tabata un falta di respet.
Sin ningun excusa Mike Eman a bolbe presenta su mes na Aruba y su unico aporte den tur e temponan aki tabata manifestacion y protesta mientras otro mester a drecha e desaster cu el a laga atras.
Ora papia cu Arubianonan ta haya un resumen di Mike Eman den politica, cu ta cuminsa for di 1986 ora Mike Eman como sombra di su ruman homber, Henny Eman, a crea un funcion pa su mes manera nunca politica na Aruba a conoce.
For di prome momento cu e pais Aruba a cuminsa existi, Mike a haci su entrada pa bira e dirigente real di Gobierno Henny Eman y e persona cu tabata manipula mundo politico di Aruba, sin cu nunca el a participa na eleccion.
Mike a haya un nombramento den e prome Gobierno di Aruba, manera nunca politica a otorga na ningun persona.
Te awe e funcion di Mike Eman den Gabinete Henny Eman nunca a wordo iguala y nunca a papia di e gasto cu Mike Eman tabata pa e pais Aruba, di cual Henny Eman a bira Prome Ministro despues cu a kibra Betico Croes, cu tabata e homber cu a logra nacemento di pais Aruba cu a wordo traiciona cu 12-8 di Emanismo discriminatorio.
Cuanto placa Aruba a duna Mike Eman for di prome momento cu Aruba a nace y AVP a crea trabou pa Mike den e Gabinete di Henny Eman como sombra di su ruman?
Kico Mike Eman a haci pa Aruba cu a haci tur cos cu Aruba por a haci pa Mike Eman, cu debe Aruba tur loke e ta.
Ta Aruba a paga pa Mike Eman por tabata sombra di Henny Eman y asina por a sigui subi ora hasta Tico Croes a wordo recorda cu e no ta Eman y cu mescos cu Betico e tambe ta Croes.
Ora Mike a haya mando di Aruba el a destrui Aruba. E pio gobierno cu historia di Aruba a produci, manera tur relato oficial ta mustra, ta e gobierno di Mike Eman, cu awe ta kere cu Pueblo mester bolbe pone Aruba den su man.
Kico Mike lo haci cu Aruba si e bolbe na timon? Termina su trabou? Finalisa su obra destructor di e pais, cu e debe tur loke e ta?
Mike Eman ta e peliger di mas grandi cu Aruba por conoce manera historia ta demostra. Un homber cu a crece, mientras el a pone Aruba sink. Un homber cu un mascara di traidor pasobra no tin otro nomber pa un politico cu ta destrui su pais manera Mike Eman a destrui Aruba.
No kere DIARIO! Bay lesa rapportnan. Bay lesa di e placa cu Citgo a costa Aruba. Tuma nota di e placa di Aruba cu a bay perdi na man di Mike Eman, cu a demostra cu e no ta sirbi como dirigente di Aruba.
Den crisis grandi cu Aruba a conoce pa loke el a haci, Mike a bay sconde manera semper el a sconde pa berdad. Kico Mike kier ofrece Aruba awe pa e sigui haya oportunidad pa biaha y hunga rey?
Historia ta duna e contesta. Cifranan ta papia un palabra. Mike no por duna Aruba nada. Aruba si a duna Mike tur cos. Hasta oportunidad pa trapa riba bienestar di Aruba y destrui patrimonio di Arubianonan cu a lucha cu sudor di nan frenta pa nan luga.
Berguensa ta loke Emanismo a laga atras pa Aruba!
