Segun Diego de Cuba, presidente di STA:
ORANJESTAD (AAN) Diego de Cuba, Presidente di Sindicato STA, siguiendo con su entrevista cu Matutino DIARIO, a subraya cu si pone na Aeropuerto un bon base, y elimina e discriminacion, persecusion, y dictadura cu tin, e ora ey AAA NV ta bira un compania saludabel.
“Anto, mi tin cu bisa cu e ultimo añanan den concepto di STA, nos ta ripara cu hopi empleado ta bay trabao pasobra nan tin un bon contrato colectivo, un bon trabao, un bon entrada, pero hopi di nan ta bay gewoon, spanta, pasobra nan no sa ki dia ta toca nan y esey no mester t’asina.
“Mi ta kere cu ora bo ta bay trabao bo mester bay alegre, contento cu bo trabao, loke no ta sosode bao hopi di e empleadonan di AAA NV, principalmente den e parti operacional. Mi no a haya hopi feed back di parti di oficinistanan, aunke kizas nan tambe tin nan preocupacionnan; pero den e parti operacional si STA a ricibi asina tanto keho y p’esey nos ta haci reunion awe. Y kico a pasa cu den e ultimo reunionnan cu nos a solicita cu James mes, nunca el a bin sinta na mesa, e tabata manda e hefe di HR y otro hendenan rond di dje, pero masha poco tabata tin hende sinta na mesa; esey ta un falta di respet pa e sindicato, y pa e trahadornan”, de Cuba a indica.
El a remarca cu anto e cabayero James Fazio, a presenta y e ta un persona operacional. E por bisa bo unda bo a faya, y duna bo e motibo tambe pakico bo a faya. De Cuba a expresa cu e ta kere cu esaki ta un di e problemanan grandi. “Bo por traha un cortina di huma masha bunita mes, pero tras di dje tin un desastre, mescos cu un kelder, pafo ta masha bunita pero pafo ta putri. Pesey mi ta kere cu James Fazio ta e persona indica pa traha riba dje. E proyecto 20-30 eigenlijk el a inici’e. “Y nos tin tur e documentonan di e hendenan cu ta hinca den e proyecto aki, pero den nos concepto e ta conociendo un retraso, e tabata full cla pero tabata tin tanto fout den dje tambe, cu aworaki mester wordo dedica dos of tres aña pasobra no tin mucho espacio mas, y turismo di Aruba ta sigui crece”, Diego de Cuba a señala.
