ORANJESTAD (AAN): Bo a yega di puntra bo mes, con ta sinti pa bo ta un inmigrante?
Pa bo keda confronta insiguridad, temor, y separacion di hopi tempo for di bo cas y pais natal.
E momento a yega pa tende storianan berdadero di un soldat, tambe un empresario, con nan ta relata di e biahenan peligroso, e lucha cu nan status legal, cu no por haya cuido medico ni trabao, y e miedo cu cualkier rato nan por wordo deporta.
Universidad di Aruba lo bay presenta dia 10 di Maart 2026, e documentario “Hidden Life: Migrant Stories”. Un momento unico pa comunidad bay mira, refleha, y conecta.
E documentario “Hidden Life: Migrant Stories” ta e historia conmovedor di e mas di 23.000 Venezolano cu ta aworaki na Aruba y Corsou kendenan a huy pa aki, debi na e crisis na nan pais natal, Venezuela. Aunke tur dos isla Caribense ta forma parti di Reino Hulandes, e procedimento pa asilo a bin cu hopi obstaculo. Esey nifica cu e refugiadonan riba e islanan ta finaliza den un ‘bashi legal’, sin acceso na trabao legal ni atencion medico.
Como Universidad, nan kier crea un espacio pa dialogo riba e dilema social aki.
Impacto pa refugiado: Den e documentario aki cu ta 68 minuut largo, traha door di Martin Maat y Hans Hermans, nuebe refugiado Venezolano di tur ambito social ta papia pa prome biaha abiertamente riba nan bida den sombra, den e parti di Caribe Hulandes. For di un soldat cu a deserta, te na un metsla, y di un empresario di catering te na un specialista di educacion. Nan ta papia di nan forma peligroso di huy cruzando lama bruto, nan estadia den Centro di Detencion na Corsou, e falta di acceso na atencion medico, eplotacion di parti doñonan di trabao, y e miedo constant di wordo deporta bek pa Venezuela. Tur e personanan aki tin den comun cu nan tin hopi aña sin mira nan famia na Venezuela.
Despues di a pasa e Documentario aki, lo bay tin un discusion di panel cu 3 studiante di Universidad di diferente facultad. E studiantenan aki tambe lo comparti nan experiencia y background di nan nacionalidad, como tambe e trabao cu nan a haci cu inmigrantenan.
Si bo kier bay mira e Documentario y scucha e panelistanan, corda registra na e website aki:
E screening di e documentario ta riba Diamars 10 di Maart 2026, den Aula na Universidad di Aruba.
