Otro cacho di cunucu rumbo pa Merca

ORANJESTAD (AAN): Desde cu e famoso cacho di cunucu Jonah a haya spotlight di prensa Mericano ora cu el a ricibi un dia special

na su honor den stadion di Miami Marlins di MLB Baseball... por mira cu tin hopi hende mas ta enamora cu ‘cachonan di caya’ di Aruba, y ta haci tur lo posibel pa por hiba nan bek cu nan pa biba na Merca.

   Aunke na Aruba nos conoce nan como ‘Cacho di Caya’, y otronan ta yama nan ‘Westpointer’, por nota cu desde cu e cacho Jonah a bira famoso, ta tur hende ta yama nan ‘Cunucu Dog from Aruba”.

   Recientemente algun turista a enamora di e cacho puppy aki na Aruba, y a haya nan deseo bira cumpli cu nan por bay cu ne na Merca.  Sinembargo tin hopi papeleo pa haci, cu tambe examinacion na Veterinario, y mucho mas.  Pa ora cu esey a caba, ya caba e turistanan a regresa bek nan cas na Boston, estado Massachusetts na Merca.

   Pero nan ta haci peticion pa wak kende ta bulando rumbo pa Boston cu aerolinea jetBlue y cu ta bira boluntario pa acompaña e cacho.

   E biaha aki, ta e turista Karen Robbins Mosca a ofrece di ta e anfitrion di e cacho chikito aki, pa asina transporte riba vuelo di Aruba pa Boston, pa asina e bay biba cu su famia nobo.  Karen ta stima animal, y pesey cu placer a tuma e encargo, y a haci e viahe cu e cacho.

   El a pone e potretnan riba Social Media di su viahe cu e cacho, saliendo den Terminal di Aeropuerto di Aruba.  Den menos di 1 dia ya caba el a haya como 500 reaccion.