Contrario na Benny Sevinger,
ORANJESTAD (AAN): Otmar Oduber a comenta riba declaracionnan di miembro di Parlamento pa AVP, Benny Sevinger cuestionando maneho di Oduber pa loke ta desperdicio di sushi.
Otmar ta indica cu e Plan Nacional pa maneho di desperdicio di sushi a wordo traha na 2018 y a wordo carga door di tur gremio na Aruba, incluyendo e comision di bisiñanan di Parkietenbos y vecindario. A ehecuta ‘al pie de la letra’ e plan aki y caminda a cera e dump di Parkietenbos y cu solamente por a deposita material grof eynan, a bin cu e solucion temporal pa 2 aña y mey na Ser’i Teishi y hasta a haci e destaho publico na nivel mundial cu participacion di mas di 18 compania di henter mundo pa incinerator. Lamentablemente esaki a para pasobra Parlamento di Aruba te dia di awe pa motibo di metemento den politica y influencianan externo no a pasa e ley di Serlimar. Es decir, e ultimo fase den cual mester a bin un incinerator pa Aruba ta pega ainda.
“Sr. Benny Sevinger den su declaracion tin e cohon di bay bisa cu Otmar Oduber no a termina cu ehecucion di e plan cu mi mes persona a laga traha como minister e tempo ey na 2018 pasobra mi mester a complace compinchenan. Benny Sevinger tin cu corda cu e ta unico politico, minister y actualmente miembro di Parlamento cu ta condena na un aña di prizon pasobra el a bay yuda compinche, el a bay yuda amigonan”, Otmar Oduber a declara y ta agrega cu den e acusacion falso cu tin contra dje den e caso Flamingo, no tin ni un acusacion di lo a ricibi placa of a wordo soborna cu placa of a duna placa pa cualkier cos por a tuma lugar.
“Lo ta bon pa Sr. Benny Sevinger cuminsa haya cuer’i cara y realisa cu tin un sentencia contra su persona y cu e no por cana acusa tur hende den comunidad haciendo politica ouderwets cu semper a wordo haci di purba acusa oponentenan politico”, Otmar Oduber a conclui.
A yega ora di pone probecho personal un banda y caba di ehecuta un plan bon hinca den otro cu a keda forma na 2018. E ley di Serlimar pega ya caba pa 5 aña den Parlamento mester worde trata y ehecuta. E ley ta haci Serlimar mas independiente, auto financiero y ta crea e espacio pa un solucion duradero mediante e proceso di un incinerator, siendo un “proven technology”.
