Bao e Lema “Planeta vs Plastic”:
ORANJESTAD (AAN)—Bao di e Lema “Planeta vs Plastic” awe, dia 22 di April ta wordo celebra e Dia Mundial di Mama Tera. Na 2009, e Asamblea General di e Organizacion di Nacionnan Uni (ONU), a designa dia 22 di April como Dia Internacional di Mama Tera, cu e obhetivo di recorda cu e planeta y su eco-sistemanan ta duna nos bida, y cu e meta di logra e husto ekilibrio entre e necesidadnan economico, social y ambiental di e generacionnan presente y futuro.
“Cu e dia aki nos ta asumi e responsabilidad colectivo di fomenta e armonia cu e naturaleza, y ta intenta concientiza e sociedad mundial pa cuida pa cuida e planeta y haci un uso responsable di dje, pa motibo cu esaki ta un condicion necesario pa su mantenimento y funcionamento corecto di locual ta depende, tanto nos supervivencia como esun di e generacionnan futuro”, ONU ta remarca.
Awe, mas di 140 pais lo organiza actividadnan manera conferencianan di concientizacion, plantacion di mata y otro eventonan relaciona cu ecologia, y tambe pa combati polucion y fomenta reciclahe di productonan di plastic.
Aunke e Dia di Mama Tera ta wordo celebra for di 1970, na 2009 e Asamblea General di ONU a declara e fecha aki oficialmente, despues di manifestacionnan cu a tuma lugar den henter mundo, protestando pa un mayor proteccion di e medio ambiente.
E obhetivo no tabata otro cu sensibiliza mundo henter tocante e inconvenientenan genera door di e contaminacion y e super-poblacion, e conservacion y biodiversidad y otro problemanan di indole ambiental.
For di e tempo ey, dia 22 di April ta sinonimo di respet, sostenibilidad, fomento di reciclahe, y di accionnan mas saludable pa nos planeta.
Pa reverti e situacion di e consecuencianan negativo cu nos accionnan tin riba e planeta, ta rekeri di e colaboracion individual y colectivo na nivel di comunidad, gubernamental y corporativo.
Na nivel corporativo y gubernamental por realiza campañanan pa eradica e cortamento di mata, e contaminacion cu plastic y demas desecho industrial y e explotacion masivo di e recursonan natural. Como obhetivo pa un produccion mas sostenible y un consumo mas responsable. Na nivel individual, nos cada un y por realiza accionnan chikito cu por nifica hop pa nos, cada bez mas daña, Planeta Tera. E reduccion di e marca di carbon ta un di e accionnan principal.
