Organizacionnan social ta uni pa carga e Vision Sosten pa Mayor

ORANJESTAD (AAN): Recientemente e Comision Vision Pedagogico a organiza un “kickoff event”cu a conta cu un sala yen di profesional

cu ta lanta tur dia pa traha na bienester di nos muchanan. E evento aki ta cera un trayectoria caminda organizacionnan riba tereno social a pasa aden hunto y cu sosten tecnico di UNICEF Hulanda pa por yega na un vision colectivo pa “Sosten pa Mayor” aki na Aruba.

   Na mes momento e evento ta marca un inicio di un proceso unda lo duna e vision aki bida door di wak con cada organizacion cu a aporta na esaki por carg’e. Pa e ocasion historico aki un delegacion di cinco persona di UNICEF Hulanda como tambe un delegacion di Curaçao cu ta consisti di tres miembro di nan Comision Pedagogico a bin presencia e desaroyo aki di cerca.

   Señora Ytske van Winden como un experto di UNICEF cu amplio experiencia internacional riba e tereno di sosten pa mayor a haci un presentacion y a elabora riba e importancia di tin un vision y e elementonan esencial cu e ta wak den e vision cu Aruba a desaroya. El a remarca specificamente cu e proceso cu e ta wak riba nos isla ta uno cu e no a topa den tur e diferente paisnan cu el a traha y cu e colaboracion y union cu tin riba e tema aki ta impresionante.

   Si nos wak e Tratado Internacional di Derecho di Mucha, e papel cu mayornan ta hunga ta uno importante, manera naturalmente boso sa caba. Lantamento di mucha ta parti di un fundeshi importante di un sociedad fuerte y sano. Ora cu mayornan sinti nan apoya, muchanan tin mas chens pa crece den un ambiente cu ta nifica cu nan por desaroya nan potencial completo. Ora cu tur mucha por haci esaki, nos comunidad tambe ta prospera a largo plaso.

  E Comision Vision Pedagogico a ser instala desde 2016 y ta presidi door di Departamento di Asunto Social y tin como miembro tur e instancianan cu tin como meta princial diario pa duna mayornan sosten. E organnisacionnan aki ta: Fundacion Pa Nos Muchanan, Tienda di Educacion, Wit Gele Kruis y Fundacion Respeta Mi. E comision ta conta cu un sosten di aproximadamente 30 organizacion cu tambe ta carga e vision pa lanta muchanan den un ambiente safe y amoroso pa nan por desaroya nan capacidad maximo. Nan ta compronde cu cada famia tin su propio situacion, preguntanan, y decisionnan cu nan mester tuma. Pa e motibo aki mes ta esencial pa nos sigura cu mayornan tin e recursonan y sosten cu nan mester pa guia nan den e biahe aki.