ORANJESTAD (AAN): E siman aki, presidente di Organizacion Pensionadonan Publico Arubano (OPPA), esta Ireno ‘Ivo’ Valdes, a splica cu un preocupacion cu tin ainda ta e prima di AZV.
Pensionadonan no ta haya cu e prima di AZV ta husto, pasobra e ta desproporcional compara cu e prima di un empleado.
Anto stop di categoriza e pensionado como un ‘independiente’, of un ‘zelfstandige’ manera esnan cu tin negoshi.
“Nos pensionadonan no tin negoshi, nos tin djis un entrada fiho sin haya un ahustacion pa hopi aña,” Valdes a indica. “Nos ta pidi pa Gobierno nobo duna e problemanan di salud entre e grandinan mas atencion. Percura pa e cuido medico ta accesible, y percura pa e ta di calidad halto. Anto ban traha riba un programa di prevencion contra malesa.”
Ta conoci cu AZV ta un instancia curativo, y nunca ta traha den aspecto preventivo. Si cada biaha Gobierno ta papia di Canasta Basico saludable, tin di percura pa e Canasta Basico ta pagable tambe.
Valdes ta puntra su mes, si acaso e Gobernantenan actual nan mes ta bay haci compras, of ta hende tin cu ta bay haci compras pa nan? Pasobra e prijsnan den Supermarketnan tur ta tremendamente halto. Y si bo kier come saludable, esey ta salibo mas caro tambe.
“Nos poder di compra a bay hopi atras,” president Ivo Valdes di OPPA a indica. “Anto e pensiun di nos grandinan, nos mes cu tin 2 pensiun ta yora. Corda riba e pensionadonan di SVb cu tin 1 pensiun so!”
Na opinion di OPPA, varios compania tin di bin cu tarifanan mas ‘social’, por ehemplo pa paga awa, coriente, telefon, cableTV. “Nan ta bisa cu e tarifanan ta abao, pero ainda nan ta hopi halto,” e president di e organizacion a bisa. E ta sigui pidi pa keda mantene infrastructura y medio ambiente, y ora cu Gobierno bin cu ley, corda cu nan tin di wordo enforsa. No djis traha ley pa traha ley. Aki Valdes a duna ehemplo cu a bin cu Ley di Cacho, pero ainda e no ta mira menos cacho riba caya.
Aruba tin hopi ley, pero no tin hende ta enforsa nan. Awor grandinan a bira vulnerable pa cu seguridad na cas! Pues tin di bin cu maneho pa promove seguridad bao di nos grandinan.
E Centronan di Bario tambe, segun OPPA, e momento a yega pa Gobierno nobo bay stimula nan den e forma pa traha. Tin hopi Centro di Bario cu ta draai na un forma minimo, pasobra no tin suficiente placa.
Tambe OPPA ta opina cu tin di keda pone atencion riba Enseñanza! Corda cu Enseñanza ta e vehiculo mas importante di un pais pa e desaroya y bay dilanti. Y Aruba tin di adapta su sistema di enseñanza pa entrega muchanan cu ta caba scol y mesora por bay traha.
“Nos sistema di enseñanza ta hopi anticua, y no ta cumpli cu e exigencianan laboral. E no ta atractivo tampoco ni pa e docente ni alumno. Tin di bay cuida esnan cu ta suministra educacion. Pone nan sinti cu nan ta trahando den un ambiente dushi cu ta necesario pa enseñanza!”
