A habri November cu 42.762 trahador registra na SVb
* Sector HORECA, construccion y seguridad ta fayando den registracion
ORANJESTAD (AAN): Edwin Jacobs, Director di SVb a indica cu si mira e cifranan di loke ta e fondo di pension di e seguro di e trahadornan mes, a habri November cu 42.762 trahador registra na SVb, locual ta significa un aumento di 2003 trahador, durante e periodo di 10 luna cu a pasa.
Jacobs a sigui bisa cu ainda no a yega na e nivel di 2019. Ta 900 trahador menos cu 2019. Ta bezig cu un campaña cerca e dunadornan di trabao cu ta e registracion di e trahador. Esey ta algo cu ta fayando.
Ta ripara cu e companianan no tin e disciplina ainda pa registra e trahadornan na SVb, cu tur e efecto cu e por tin pa nan, a remarca.
SVb ta bezig controlando negoshinan. Nan sa e sectornan caminda no tin registracion cu ta den sector di HORECA, construccion y seguridad. E tres sectornan aki SVb tin bista riba dje. "Nos ta atende y nos ta subi caya y nos ta haya tips tambe. Un apelacion na dunador di trabao pa evita multa".
Jacobs a bisa cu na momento cu nan constata cu tin trahadornan na pia di trabao cu no ta registra e dunador di trabao ta haya multa. Si tin hopi trahador, ta bira mas problematico.
E prima cerca SVb ta un total di 3 %. "Registra bo trahador, paga su prima. Den caso cu e bira malo, e tin un entrada sigura. Den caso cu e tin un accidente di trabao, e tin un entrada sigura. Mi ta haci un apelacion fuerte riba esey", Edwin Jacobs a splica.
Cifranan ta mustra cu tin un falta den registracion di trahador. Si un persona tin un luna mes na un trabao e mester ta registra na SVb. Si tin un part-time, e trahador tambe mester ta registra na SVb.
Un dunador di trabao mester sa di e ley, a enfatisa. SVb ta simplemente constata y actua. E riesgo ta wordo poni riba e trahador y pesey a conseha tur doño di trabao pa registra su trahadornan. Awor tur informacion ta online y e proceso ta mas facil ainda, a señala.
