Premier Evelyn Wever-Croes:
*Gobierno a lanta un Comision pa atende cu esaki
ORANJESTAD (AAN) Den entrevista cu DIARIO, Minister Presidente mr. Evelyn Wever-Croes, a toca e tema di e carta cu el a ricibi di e Organizacion di Pensionadonan Publico di Aruba (OPPA), unda ta mustra su preocupacion pa cu nos adultonan mayor.
Minister Presidente a comenta cu OPPA a manda un carta den cual nan ta expresa nan preocupacion den diferente area: den cuido, finanzas, pensioen, impuesto. “E ora ey nos a lanta un comision di diferente disciplina, pa atende cu e peticion aki”, e dignatario a menciona.
Un parti grandi di esaki ta cay bao di Minister Ursell Arends, encarga cu adultonan mayor, y Minister Dangui Oduber pa loke ta e tema di salud di nos grandinan.
“E carta aki na e momentonan aki ta den tratamento. Nos ta preparando e Comision pa nos bay atende e diferente puntonan cu OPPA, y splica tambe kico tur nos ta haciendo, pasobra desde cu nos a drenta den gobierno un punto hopi principal, ta nos grandinan”, e mandatario a señala.
Wever-Croes a indica cu e mes ta bin di e area di belasting y e ta mira con e peso di belasting ta afecta e grandinan, y el a lucha hopi duro pa alivia e peso, pero no a logra pa loke ta kita completamente e belasting riba e pensioen di biehez.
“Awo cu ns a studia e materia miho, mi no ta kere cu mester elimin’e completamente, pasobra un hende cu tin tres pensioen por paga su belasting trankil, esun cu tin dos pensioen a dal’e duro, y esun cu tin un pensioen, sigur! Aworaki, nos ta trahando riba e cambionan di ley, un biaha mas pa por acomoda y baha e peso di impuesto un poco mas”, Minister Presidente a bisa.
E dignatario a señala cu e pensioen di biehez, gobierno ta bezig aumentando poco, poco, pasobra e tin cu hacie na un manera responsable. El a trece dilanti cu SVb tambe a traha un rapport riba dje y e ta kibra e fondo, y esey ta algo cu ningun hende kier pa sosode, ni pa esnan cu aworaki ta cobrando pensioen, ni esnan cu ta pagando prima y mañan kier haya pensioen. “Pero eynan nos mester busca un balance pero nos a hisa e pensioen di behes te cu aworaki, te caso 15% y nos ta sigui. Nos ta sperando pa e siguiente aumento, e otro aña atrobe”, Prome Minister a informa.
