Pa di seis aña consecutivo
ORANJESTAD (AAN): Durante un conferencia di prensa, Rubiela Toppenberg, trahado preventivo na Fundacion Anti Droga Arubano (FADA) a anuncia proyecto cu pa di seis aña consecutivo nan ta organisa pa comunidad di Aruba, cu ta trata di un documentario basa riba bida real.
Den añanan anterior, FADA ta busca diferente persona cu ta conta nan realidad relaciona cu adiccion, salud mental y diferente topico. E aña aki nan a scoge cuater topico hopi interesante, cu sigur lo capta atencion di comunidad. Ta topiconan cu tin como meta inspira, siña y educa nos comunidad, specialmente durante temporada aki.
No ta desconoci cu Aruba tin un problema serio cu adiccion. Y e aña aki a scoge e topico riba adiccion di humamento. Den un entrevista cu specialista di pulmon, dokter Caroline Becker, nan a compronde cu casonan di cancer di pulmon ta hopi halto. Esaki ta un di e motibonan cu e documentarionan ta basa riba humamento, na unda Dufy Arends lo conta problemanan di salud y contratemponan pa motibo di humamento.
Toppenberg a indica cu un otro topico cu por trece poco tristesa, pero por habri wowonan specialmente di e hobennan. Nan a entrevista algun adicto ambulante, cu lo conta cuanto aña nan tin den e bida aki y con nan ta bezig ta maneha esaki. E parti di e documentario, sigur lo laga hende cu boca habri pero tambe hende por siña hopi, specialmente siña compronde e personanan aki miho, pasobra no ta nan culpa cu nan ta riba caya awendia. Un otro adicto ambulante lo conta con e tabatin tur cos y durante di añanan el a perde tur cos pa su adiccion na droga. Adiccion ta pone un hende perde tur cos.
Un topico hopi great cu nan a traha riba dje e aña aki, ta discalculie, na unda juffrouw Figaroa lo conta di su realidad, cu el a biba cu ne y con esaki a afecta su salud mental. Awendia e ta un profesional, cu a scoge pa bay dilanti a pesar di su condicion.
Durante luna di September e documentario lo pasa tur diaranson, pa 9'or di anochi na diferente plataforma social, Diario TV y Tele Aruba, na unda nan lo transmiti esaki pa asina comunidad por wordo educa y informa riba e topiconan aki.
Toppenberg a indica cu nan ta hopi contento di por lansa e documentarionan aki y ta invita comunidad pa mira esaki y si por tin pregunta relaciona cu e topiconan presenta por libremente tuma contacto cu nan.
